«Слово» – 21-ша неділя по Сошествії Святого Духа – неділя, 9.00 год.

Днешній образный приклад о сіячови, котрый вышов на своє поле розсіяти своє зерно, є нам менше зрозумиле як людям, ку котрым Ісус говорив. Тогды ся сіяло ручні, а так єдно зеренко пало коло дорогы, інше до камянистой землі, далше до терня і далше на добру землю.

Но і што было далше з тым зернятком, залежало, де пало. Коли на край дорогы ці на дорогу – чекало го потоптаня од людей і выдзобаня од небесных птахів.

Тото, што пало на камянисту землю, оно выросло, но не мало в собі коріня і як вышло сонце спріло. Далше, котре пало до терня, оно тыж выросло, но выросло і терня і го задавали. А далше пало до доброй землі, принесло новы плоды. Хто є тым сіячом, што є зернятко і што є та земля?

Тым сіячом є сам Господь наш Ісус Хрістос, котрый вышов од Отця на землю, став ся чоловіком, жебы розсівав своє слово спасіня. Тым зернятком є Його слово. А што значіть поле? То суть людьскы душы, де тото слово падать. Як суть наставлены, як суть они одкрыты на слуханя і приятя того слова.

На край дорогы – то суть слухателі, котры лем недбало, без уважности, поверьхово выслухають слово. Не є там віра. І за тото слово ся не утримать, бо приходить діавол, котрый тото слово скоро заберать із душы, жебы чоловік ся не обернув, не робив покаяня і не быв спаеный.

На скалисту землю – то є до душ тых, котры слухають слово, радостно го приїмають. Но у них є то ем до часу. Коли є покій, коли не грозить небезпека, пронаслідованя, коли не треба жертву – тогды тото слово радостно принимають. Но як треба принести жертву вірности, як треба зазнати і пронаслідованя і смерть про тото слово, тогды ся одрікають. То значіть тота катеґорія людьскых душ не мать в собі коріня терпезливости і вытырвалости в часі біды, пронаслідованя, а так не принесе плоду.

До терня – то суть душы, котры тыж радостно принимають слово, но старости жывота, роскошы, пожадливости задавляють тото слово і так і оно є без плоду. Лем тоты, котры з добрым і чістым сердцьом принимають слово, приношають многы плоды.

Дорогы радіослухачі, теперь сі дайме одповіь на опрос: де я належу, де належыть моя душа. Нашла ся там в дакотрій катеґорії безплодности. Но не мать падати на духу. Тото слово нас веде ку познаню правды о собі, де ся находиме, яков земльов є моя душа, но не остати лем на тім познаню. Бо, тото, што не є можне в природі, то в духовнім жывоті можно є.

Кажда душа ся може змінити, стати ся тов плодоноснов земльов, приносячі богатый плод. Рішіня є у волі каждого, ці стане ся плодоноснов земльов або перебуде в катеґоріях неплодности ці дорогы, каміня або терня. Слава Ісусу Хрісту!

В неділю, 25. октобра 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. октобра 2026 р. о 12.00 год. і 26. октобра 2026 р. о 2.00 год. за русиньскым часом.