Выстава з нагоды юбілею Василя Свалявчика

Як інформовав Закарпатьскый областный художный музей імени Йосифа Бокшая в Ужгороді, 5-го новембра 2026-го року одбуде ся вернісаж выставы творів русиньского маляря Василя Свалявчика, котра є присвячена його недавному юбілею – 75 рокам од народжіня.

Орґанізаторами выставы окрем музея суть і Закарпатьска областна рада, Закарпатьска областна державна адміністрація – Одділіня културы, і Закарпатьска орґанізація Націоналного общества художників Україны.

Выстава має назву Родный край. Як музей інформовав, якраз родный край – Підкарпатя, є головным джерелом маляря і темов його творчости.

Основу юбілейной выставы творять пейзажы, но навщівници будуть годны видіти і роботы в іншых жанрах. „Выстава захопить різны періоды творчости художника – од найранішых полотен до цалком новых, мальованых дословно перед пару днями, і представить многосторонність його умелецького доробку,“ написав музей ку выставі.

Юбілейна выстава творів Василя Свалявчика запрошать подля музея любителів уменя посмотрити на познаты куточкы „Закарпатя“ очами художника, про котрого любов до родной землі і одданость традіціям Підкарпатьской малярьской школы стали невычерьпным джерелом творчого надхненя.

Василь Свалявчик

Василь Свалявчик (14. 10. 1951 р.) народив ся в селі Зняцьово, на Підкарпатю. Умелецьку освіту здобыв на Ужгородьскім учілищу ужыткового уменя, на одділіню умелецькой мальбы в 1971-ім році. Є наслідником Підкарпатьской малярьской школы, быв учньом такых їй представителів як Микола і Едіта Медвецькы, Антон Кашшай, Гаврил Глюк, Іван Ілько ці Янош Шутєв.

Членом Общества художників Україны став у 1987-ім році, а так само є членом Общества художників Карпатьскы фарбы – Закарпатьска область.

Почас свойой професіоналной художной карьєры быв веце раз оціненый за свою роботу. В 1998-ім році став лавреатом Областной премії імени Йосифа Бокшая і Адалберта Ерделі, у 2002-ім році му быв присвоєный тітул Заслуженый художник Україны, і в році 2016 тітул Народный художник Україны.

Мав персоналны выставы на Україні, на Словакії, в Німецьку ці Польщі. Роботы познатого підкарпатьского русиньского маляря суть в музейных і пріватных збірках на Україні, в Чеській републіці, Мадярьску, Кітаю, Ізраілю, на Словакії, в Німецьку, США, Канаді, Швейцарії, Росії, Великобрітанії, Австралії ці Японії.