Лемковина Ультра Трейль 2026 – о змаганях, штуці і реґіоні / віторок, год. 10.00

Каждого рока в жолтни/октобрі Низкій Бескід стає ся місцьом стрічы бігачів з цілой Польщы і заграниці. Притігают іх вымагаючы (мимо вшытко) трасы, осінні краєвиды і выняткова атмосфера Лемковины Ультра. Але за спортовом ривализацийом крыє ся тіж оповіст о реґіоні, його істориі, мешканцях і спадковині.

Одкале взяла ся думка на змаганя з лемківскым названьом? Як через рокы зміняла ся подія і єй звязок з культуром Лемків? Чом мотивом тогорічной едициі стала ся абстракцийна різба артисты Богдана Карела?

О тым бесідуєме з думкодавцьом і директором змагань Кжыштофом Ґайдзіньскым і Камільом Трохановском-Цюрик, ґрафічком, яка зрыхтувала візуальну сторону подіі. Оддаєме тіж голос участникам змагань, в тым лемківскым літачам, для котрых поконуваня кілометрів трас то не лем спортовый выклик, але тіж особисте досвідчыня завязане з достоменністю.

Лемковина Ультра то тіж примір того, як штораз векша популярніст реґіону влият на його краєвид, локальну господарку і спосіб постеріганя Лемковины. Де містит ся границя медже промоцийом а захованьом выняткового характеру Низкого Бескіду? Ци спортова подія може єдночасно приближати історию і сучасну культуру його мешканців?

Просиме выслухати довязычну реляцию в атмосфері тогорічных змагань Лемковина Трейль.

Премєра проґраму в віторок 10. листопада/новембра о 10.00 год., повторіня в середу 11. листопада/новембра о год. 2.30 та в суботу 14. листопада/новембра о год. 8.30.

Audycję zrealizowano w ramach projektu pn. Horyzont Beskidu Niskiego finansowanego z dotacji Rządowego Programu Fundusz Inicjatyw Obywatelskich NOWEFIO na lata 2021-2030