«Слово» – 24-та неділя по Сошествії Святого Духа – неділя, 9.00 год.

За Ісусом приходить начальник сінаґоґы Яір, котрый пришов просити о здравля свойой дівочкы, котра умерала. Ісус вєдно зо своїма учениками выбрав ся до його дому. Но по дорозі ішло з ним і много людей. Была там і єдна жена, котра терпіла двандцять років на кровотечіня.

Іншый євангеліста додавать, же од дванадцятьох років. На лікаря выдала цілый свій маєток а нич не помагало. Мала ся іщі гірше. Коли чула, же Ісус іде тов драгов, де ся находила, повіла собі, я лем кедь ся дотулю края його облечіня, буду здрава.

Тота жена, мала добре наміріня і силну віру, же старчіть ся лем дотулити края облечіня. А так з тов віров она ся перестисла аж ку Хрістови помеджі народ а легонько ся дотулила края облечіня. А лем што то зробила, такой была здрава. Но яка велика радость наповнила єй сердце. По тількох роках, теперь єм знова здрава. Кілько трапліня, кілько понижованя, кілько намаганя єм мусила пережыти. Теперь є то реалне, єм здрава.

Уж хотіла ся тайно вытратити з громады людей, нихто бы о ній не знав. Но з тых думок радости єй перебрав голос Ісуса, котрый зазвучав як гром до їй душы. Хто ся ня то дотулив? Нараз тоту жену наповнив великый страх.

Дайме собі орпос, чом была так перестрашена? А з чого? Но в книзі Левіт ся в пятнадцятій главі пише о жені, котра мала довге кровотечіня. Така жена ся брала за нечісту а вшытко, чого ся дотулилиа, робила нечістым. Ту є причіна, чом ся она бояла, што буде наслідовати. Тадь она зробила нечістым і Хріста! Не говорячі о тій громаді людей, котрых ся дотулила, кедь ся хотіла перестинути перед Ісуса.

Очековала, же Хрістос на ню наложыт даяку кару. Но зазвучіть іщі слово надії. Петро говорить: Народ тя притискує а ты ся звідуєш, хто ся ня дотулив. Но Ісус говорить: Не так, но хтось ся ня дотулив. Тогды жена приступує і одкрывать перед Ісусом і народом цілу правду о собі. Тыж і о тім, як была здрава, кедь ся дотулилиа плаща. Теперь што буде з ньов? Тадь она зробила нечістым самого Хріста. Но Ісус на ню посмотрив із любвов і повів, не бій ся, тебе сохранила твоя віра, ідь в покою.

Што на говорить тота подія? Ісус на тій жені указує і нам, же Він знать вшытко, што ся одбывать в душі чоловіка. І найтаємнішы думкы. Нич перед ним не скрыте. Тота жена хотіла ся затаїти. Ісус одкрывать і як бы повів: Жы ся хотіла сховати передомнов. Лем ся дотулити і одыйти. Но я познам і твою віру і твоє добре наміріня. Прото не бій ся. Я теперь одкрывам твою велику віру перед цілым народом. Не на твоє понижіня ани заганьбліня, але на твоє повышіня. За вшытко, што єсь мусила перетпріти, теперь тя выздвигую і давам за приклад про другых.

Так Ісус говорить і ку нам: Нич не можеш сховати передомнов. Я вшытко виджу. Прото і мы будьме як тота жена, приступуйме ку Ісусови з нашым духовным кровотечіньом – гріхом, а з віров ся дотуляйме і выповіджме перед ним. А тогды і мы учуєме тоты ласковы Хрістовы слова: Жено, не бій ся, тебе выздравила твоя віра, ідь в покою. Слава Ісусу Хрісту!

В неділю, 15. новембра 2026 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. новембра 2026 р. о 12.00 год. і 16. новембра 2026 р. о 2.00 год. за русиньскым часом.