Вечеря має ждати на столѣ и пахнути цибульомъ

Хоц некотрым ся видит што наша ґазета – ЛЕМКО – для карпаторуского народа – є міцно не на часі, бо не сотворила іщы портальовой части для тых, котры люблят почытати, як ся добрі варит і смачно іст, але зас не мате правды. В чыслі 17. за 1913 рік даєме дієтетычно-пожывны порады.

Што мате ѣсти и пити напредновку?

На перше сьнѣданя въ постели: Хлѣбъ съ масломъ, каву зо сметанкомъ.

На друге сьнѣданя: Выпити фарбуваной палюночкы, прекусити шинкомъ.

На о б ѣ д ъ: Выпити порційку зеленой, выхлипати талерикъ росолу, потомъ мясо зъ росолу зо сосомъ хрѣновымъ, цитриновымъ, помаранчовымъ, — мьентовымъ, а зрештомъ якій хто радъ.

Потôмъ шницель, або котлетъ, або карменадель, або бифштыкъ, або печинъ,

I тѣжъ выбôръ лишаме. Потôмъ пійте пиво: тарнôвске, грибôвски, лимановске, окоцѣмске, пильзненьске, ангельске, котре І кому до смаку. По пивѣ „льеґумина“. Лишаме кождому до выбору.

По обѣдѣ треба зо двѣ годинкы здѣмнути. Встанете, пôдете на шпациръ, тай выпєте каву и прекусите булкомъ. По пôдвецѣрку ляжете на канапу и пречитате газету. Потомъ пôдете до „реставраціи”, побесѣдуете о политицѣ, дашто прекусите, выпьете и домôвъ. Вечеря має ждати на столѣ и пахнути цибульомъ. По вечери каждый спить.

Мы писали до пановь и панове позволили всѣмъ хлопамъ тото ѣсти и тото пити. Може ищи дахто незадоволеный?