По фінісажы выставы «Кольорова церков» в Бортным

Ціле літо, аж до остатньой суботу (3. жолтня/октобра), в колишній грекокатолицкій церкви свв. Космы і Даміана в Бортным – тепер музейний объєкт Музею Дворы Карвациянв і Ґладышів в Ґорлицях, мож было видіти выставу «Кольорова церков».

Назва выставы навязує до поліхроматычного малярского прикрашыня, вкрываючого колиси зовнішні стіны церкви (днес уж не істніючого), а частично удокументуваного вчас ремонту церкви в 60. роках. Головний мотыв выставы – кольоры – єй авторы схоснували тіж до презентациі давного выпосажыня церкви, якє днес розсіяне єст по парох музейных объєктах. Кольоры вели одвиджаючых выставу по істориі церкви. В притворі презентувала ся істория церкви, описы єй ремонтів, богата фотоґрафічна документация та реконструкия малярского прикрашыня церкви, в храмі вірных – іконы, а в олтарі – плястычны біоґрамы вшыткых бортняньскых парохів.

По короткым підсумуваню, представленым координаторком – Клавдийом Збєґєнь, орґанізаторы вказали інтерактывну мультімедияльну презентацию, тыкаючу не лем елементів выставы, але збогачену о шырший, в тым архівальний, материял. Презентация од суботы єст доступна на дотыковым екрані, поміщеным в притворі церкви. Находит ся в ній забавовий зміст і для наймолодшых звиджаючых, для котрых зрыхтувана єст малюванка – там мож подля свойого концепту прикрасити бортняньску церков.

По презентациі одбыл ся такой пілторагодинний выклад Анджея Жыґадла – маляря, консерватора, знавці церковной архітектуры, під назвом Дослідничы та документацийны праци при забытковых деревяных объєктах. По прелекциі вывязала ся цікава дискусия над способами консервациі церковной штукы на Лемковині. Выклад будеме емітувати неодолга на антені радия ЛЕМ.фм (о докладнійшым терміні поінформуєме), а пониже презентуєме фотореляцию з фінісажу авторства Мацєя Левка – за удоступніня знимок горячо дякуєме.