Неділя Святых жен мироносиць

Як наш Господь Ісус Хрістос завершыв своє діло спасіня, нахылив голову і оддав духа. Тым вказав, же тото вшытко ся діяло не із волі злобных людей, але рішіньом його волі. По Його смерти Йосиф із Аріматеї приходить сміло за Пілатом і просить собі зняти Ісусово тіло. Пілат наперед звідує ся стотника, аж так доволить. Тіло є уложено до нового гроба выкресаного до скалы. Ку гробу быв приваленый великый камінь. І Жыди сі выпросили у Пілата варту із римскых вояків. Тото вшытко ся стало абы о то ясніше засвітила правда воскресіня цілому світу. Так были заперты рота тых, што будь говорили, же Ісус не умер, а быв лем докетічно мертвый, то є помыселно – тото было вывернуто свідчіньом стотника, котрый йому пробив ребро, або з другого боку, же ай кідь умер, но його тіло украли – прото Жыди просили варту а так хотіли задавити правду о воскресіню, но намісто тогоєй іщі веце потвердлили. Рано ідуть жены мироносиці ку гробу, жебы помазати Хрістово тіло, тото, што не стигли зробити, бо уж была субота. Хоць перед нима великый проблем, як одвалять своїма слабенькыма руками тот великый камінь, а притім не знали іщі о варті. Но маючі велику любов ку Ісосови і віру, же Бог ся постарать, ідуть ку гробу. І намісто мертвого тіла находять одваленый камінь і світлых ангелів,, котры їм звістують: Хрістос воскрес, не є ту. А по дорозі сам Господь ся їм появлять: Не бійте ся. Радуйте ся. Хоць были розчарованы, не могли выповнити своє діло любви. Принесли миро, но намісто того были помазаны они самы миром покоя і радости од Воскресшого Господа. І мы старайме ся лем о єдно, абы перебывати з Господом. Аби го не стратити через одступліня од нього через гріх, або обернутя ся ку земному. А коли ся так стане, абы со слызами, подобно женам мироносицям, го глядати. А находячі го, бо є близко тым, што глядають щірым сердцьом, наповнены і помазаны од нього миром радости і покоя, сміло голосити тому світу тоту основну правду котра мінить вшытко: Хрістос воскрес!

В неділю, 15-го мая 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15-го мая о 12.00, 15.00, 20.00 год. і 16-го мая о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Сім жен – мироносиць (ікона, з початку ХІХ ст.). Жрідло вікіпедия.