Вознесіня Господнє – неділя, 09.00 год.

Ісус Хрістос 40 днів перебывав з учениками по своїм воскресіню. Но його перебываня уж не было таке, як перед тым. Появляв ся їм і тратив ся з оч. Переходив через заперты двері. Його тіло было уж прославлене і не підлігало обмеджіням природы, котрым підлігать наше смертне тіло. На 40-тый день вывів своїх учеників на Олівову гору, дав їм послідні наказаня і возніс ся в славі до неба. Своїм вознесіньом возніс і нашу людьску природу. Ученикы смотрили своїма очами як Ісус одходить од них на небо. Посылать своїх ангелів, котры їм говорять: Тот Ісус знову прийде так, як сьте го виділи одходити. Ученикы были наповнены великов радостьов. Тота радость выходила із усвідомліня, же Хрістос є досправды правдивый Бог і правдивый чоловік. Же своїм одходом нас не зохабив, але перебывать із нами. І коли приходять в жывоті тяжкы моменты, обертайме свій погляд і перенесме ся на Олівову гору, абы сі усвідоміти, же вшытко земне є лем часне. Же перед нами є ціла вічность, котру нам Хрістос зо свойой любви ку нам приготовив. Слава Ісусу Хрісту!

В неділю, 12-го червця/юна 2016 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12-го червця/юна о 12.00, 15.00, 20.00 год. і 13-го червця/юна о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: ікона на Вознесіня Христове, XVI ст., Мічирін, Былгария. Жрідло Wikipedia.