Першый докторьскій проґрам з карпаторусиністыкы во світї – є на Пряшівскій універзітї

У другій половинї новембра того року Акредітачна комісія СР – порадный орґан влады СР – на своїй інтернетовій странцї опубліковала запис із свого послїднёго тогорічного засїданя, яке ся одбыло 23. – 24. октобра 2013 в Братїславі. Єдным з пунктів єй проґраму было посуджіня одборных компетенцій Пряшівской універзіты в Пряшові реалізовати третїй – докторьскый – ступінь высокошкольского штудія з русиньского языка і літературы, якый приправили робітници Інштітуту русиньского языка і културы ПУ. 

Днесь можеме з радостёв повісти, же на основі голосованя 21-членной Акредітачной комісії СР – од октобра 2013 на Словеньску є акредітовный докторьскый проґрам під назвов Славістіка – русиньскый язык і література в одборї штудій 2.1.28 Славяньскы языкы і літературы. 

Одборнов ґарантков докторьского проґраму є вызначна славістка і професорка Інштітуту русиньского языка і културы ПУ в Пряшові ПгДр. Юлія Дудашова, др. н., вєдно з нёв проґрам ґарантують доц. ПгДр. Едіта Комінарецова, ПгД. і доц. ПгДр. Анна Плїшкова, ПгД.

Як знаме, докторьскый проґрам штудія русиньского языка і літературы дотеперь не має ани єдна універзіта на світї. В тім контекстї Пряшівска універзіта в Пряшові здобыла світову першость і од наслїдуючого академічного року 2014/2015 зачне приїмати на докторьскы штудії в проґрамі Славістіка – русиньскый язык і література першых докторандів до 4-річной інтерной і 5-річной екстерной формы штудія.
Акредітаціов докторьского проґраму з русиністікы ся отваряють новы можности про сістематічну выхову будучіх русиністів – лінґвістів, літераторів, културолоґів, а то нелем з абсолвентів маґістерьской формы штудій на Пряшівскій універзітї, але про каждого домашнёго і загранічного адепта, котрого даный проґрам заінтересує.
Віриме але, же тоту можность схоснують такой дакотры першы абсолвенты Пряшівской універзіты, якы закінчіли маґістерськый учітельскый проґрам русиньскый язык і література.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА