Сусанна в Рыхвалді – концерт

Малопольска Туристычна Орґанізация уж 9. раз єст орґанізатором музычного фестівалю Музыка заклята в дереві. Фестівалю, якій заберат нас през ціле літо на музычну прогульку по забытковых косетлах, церквах, скансенах та інчых объєктах, находячых ся на Пути Деревяной Архітектуры Малопольщы. На каждым з концертів выступуют выдатны артисты, презентуючы клясычну, джазову, або авторску музыку. О інавґурациі Літнього Туристычного Сезону, котрого частю єст тот фестіваль, та першым концерті з того циклю, писали сме гев.

За нами уж три концерты, а перед нами іщы десят. Тот найблизший буде напевно найблизший серцю вшыткым Русинам. Раз – зато, же буде проходил в забытковій лемківскій цервки в Рыхвалді (находит ся она на Листі Світовой Спадковины ЮНЕСКО), а два – буде то єдина нагода, жебы вчас того фестівалю послухати лемківскых співанок. Орґанізаторы так міцно залюбили ся в співі Сусанны, яка выступувала в рамках того фестівалю влони в забытковым костелі в Бінаровій, же рішили другій рік запоряд запросити єй до участи в Музыці заклятій в дереві, хоц то нестрічана практыка.

Уж в найблизшу неділю, 5. липця, од 17.30 год. в церкви Покровы Пресвятой Богородиці в Рыхвалді почуєме концерт під назвом Низко сонечко – пісні душы. В репертуарі того концерту сут головні співанкы Петра Мурянкы, але тіж авторскы композициі Сусанны і народны співанкы. Сусанна буде співала по лемківскы, украіньскы, польскы і в церківнославяньскым языку. Прозвучат творы, якы односят ся до чловечых пережыть і мрий. Сусанні товаришыл буде Павел Гараньчык на клявішовых інструментах.

Послухайте і попозерайте, як было влони.

фот. Даміан Новак

Проґрам цілого фествалю найдете за тым мотузком.