Турне з цілого русиньского серця

15. жолтня/октобра т.р., выстартує турне русиньского Фольклорного Ансамблю «Рутенія» пн. Русиньскє серце. Концерты в його рамках пройдут в пятьох ріжных місцях на Словациі. Його ціль – вказати нашу дідовизну з цілого серця. Русиньского серця.

«Рутенія» своім турне задумала вказати історию прекрасных майстрів, котры іщы не так давно ходили по цілій Карпатскій Руси. То оповіст про дротарів, котрых задачом было дротуваня, направа та ліпліня діравых горнців. В інсценізациі обзераючы пізрят на жывот трьох камаратів – дротарів, котры пережывают цікавы жытьовы досвідчыня. Вказана буде доля неєдного дротаря, котрий ходил на заробок поза границі рідной Лемковины, Пряшівской ци Підкарпатской Руси. Камаратя фурт споминают на рідне село, співанкы, танці, челад. Музычне оповіданя гейбы буде одбывало ся з пізріня дротаря, ходячого по селах пілнічно-східньой Словациі, ай Сербіі.

Автором проґраму Русиньскє серце є ведучий колективу, бывший предсідатель орґанізациі Молоды.Русины та шефредактор радия Русин.фм – Петро Штефаняк. Ансамбль свій проґрам вкаже з хореоґрафіями Штефана Штеця, Славомiира Ондєйкы, Аґаты Краусовой ци Мариянны Свореньовой. Гостьом турне буде і Михал Ноґа, котрий вєдно з Народном Музыком Рутенія одограт цілий проґрам.

Проґрам турне то пят концертів. Русиньскє серце буде мож видіти:

• 15. жолтня/октобра – 17.00 год., Театр Thalia в Кошыцях;
• 16. жолтня/октобра – 15.00 год.,  Дім Культруы Стара Любовня;
• 22. жолтня/октобра – 17.00 год., Театр Александра Духновича в Пряшові;
• 23. жолтня/октобра – 15.00 год., Дім Культруы в Снині;
• 9. грудня/децембра – (точна година не єст іщы знана), Дім Культуры Дзеркаловий Гай в Братиславі.

Русиньскє серце презентує фольклорны танці та співы сел Пряшівщыны, такых як Камюнка, Малий Липник, Шамброн, Шаришскє Ястрябя, Тихий Потік, Кыйов, Семетківці, Габура, Шумяц, та з реґіону сербской Войводины, де прожывают Русины.

Білеты мож резервувати за тым мотузком до 11. жолтня/октобра т.р. (концерты в Кошыцях і Старій Любовни), та до 18. жолтня/октобра т.р (про два дальшы жолтньовы/октобровы концеры турне в Пряшові і Снині). Окрем того, білеты мож придбати в ден концертів.

Наголовком Русиньскє серце был перше названий ювілейний концерт «Рутеніі» з нагоды 5-літя основаня. Товды же, подібні як тепер, был представляний такій сам проґрам, в котрым мож было пізрити на оповіданя про приятелів-дротарів.

«Рутенія» то молодіжний ансамбль фунґуючий при орґанізациі Молоды.Русины в Братиславі. Молоды люде хотят плекати і продолжати русиньску культуру на всякых сценах світа. В марци т.р., ансамбль одбыл турне до далекого Перу в Полудньовій Америці. «Рутенія» то по правді не лем ансамбль, але і своєрідне здружыня, прото, же члены сут заанґажуваны в орґанізацию Русиньскых Ватр на Малым Липнику ци другых подій орґанізуваных через Молодых.Русинів.

Павел Стефановскій

Дротар 

Ходил дротар од хыжы до хыжы,

Горці дротувати,

Велькы, малы дротувал,

Курил файку і сплювал,

За роботу пінязі казал сой давати.

Ходил дротар од села до села,

Горці дротувати.

Палицьом ся підперал,

За дівчатми мозерал,

Кричал „горці дротувац”,

Часом собі співал.

Течут горці і велькы і малы,

Горці дротуваны.

Не смутте ся дівчата,

Же вам течут горнята,

Дідо дротар здротує,

А і пожартує.

Ходил дротар по горах стежками,

Горці дротувати.

З боку носил торбину,

Звиток дроту, мериндю,

На ногах онучы кєрпці,

Дуган в табакєрці.

Ходил дротар з Білой, Чорной Воды,

Горці дротувати.

Велькы, малы дротувал,

Курил файку і сплювал,

За роботу пінязі казал сой давати.