В Осаднім похоронять російскых вояків

В Осаднім похоронять російскых вояків

В русиньскім селі Осадне (перед тым Телепівці), в окресі Снина, у четверь 13-го октобра 2016-го року похоронять тілесны остаткы незнамых російскых вояків із І. світовой войны. Нашли їх в лісах недалеко села польскы турісты одкрыты лісныма тракторами при зважаню сяговины. Інформує о тім денник Korzár.

Як денник інформовав православный священник із Осадного Петро Сорока, турісты найджены остаткы позберали, дали до міхів і похоронили під недалекый грубый бук. О припаді было інформоване Міністерство внутрішніх діл Словацькой републікы, котре уможнило остаткы ексгумовати і похоронити на містнім цінтері.

Похорон у четверь одслужыть найвысшый представитель Православной церькви в чеськых країнах і на Словакії, Його Блаженость Ростислав, архієпіскоп пряшівскый, метрополіта. На похоронных обрядах будуть брати участь і членове словацько-російской комісії міністерстев внутрішніх діл про старостливость о войновы гробы, амбасадор Російской федерації в Словацькій републіці Алексей Федотов, як і леґенда совітьского і російского гокея Вячеслав Фетісов, котрый Осадне навщівить вже другый раз.

В околіці села Осадне были почас І. світовой войны, головно в році 1915, тяжкы бої, котры собі выжадали велике множество жертв. Мало із них было похороненых на воєньскінм цінтері, векшынов зістали на місці, де вмерли. Остаткы многых вояків были ексгумнованы в році 1929, кідь ся в селі будовала православна церьков і вєдно з вояками з цінтеря были в рр. 1933 – 1934 перенесены до кріпты під храмом, інформмовав денник Петро Сорока. Но до кріпты было перенесеных лем 1025 вояків, веце ся не вмістило. І так далшых 1467 было похороненых на містнім цінтері. За словами містного пароха в лісі і так іщі зіставать множество жертв войны. Міджі тых належали і найджены остаткы російскых вояків.

За словами православного духовного о тім, же то суть російскы вояци свідчіть то, же мали коло себе іконы Пресвятой Богородіці, православны крестикы, ґомбічкы з російской уніформы, остаткы з російскых польных лопаток і топанок.

Фотоґрафія: Історічна фотоґрафія зо зачатя будованя православной церькви в Осаднім в р. 1929. Жрідло фотоґрафії: www.krypta.sk
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА