В Будапешті одкрыють выставку Атаназа Фединця

Дня 16-го октобра 2016-го року в Будапешті в каштелю Штефанія одбуде ся подія під назвов „Шедевры Русинського Умілства“. Покровительом події є міністер обороны Мадярьска Іштван Шімічко і орґанізаторами русиньскый послнанець в Парламенті Мадярьска вєдно із „Вседержавным Русинськім Самосправованьом“, „Обществом Русинської културы“, і „Фундаціов за Русинув“.

В рамках події буде одкрыта выставка русиньского маляря Атаназа Фединця, родака із Підкарпатя, котрый бы ся в децембрі того року дожыв округлого юбілею 80-ох років жывота. Выставку одкрыє знатель уменя Балаж Феледі. На події буде выступати і Фолклорный колектів Маковіця зо Свідника. (Детайлный проґрам під статьов.)

Атаназ Фединець

Народив ся Атаназ Фединець (1936 – 2012) в Ужгороді, втогдышня Чехословакія. Быв лікарьом і малярьом. Отець А. Фединця – Александер, быв знамым ужгородьскым хірурґом, а так і Атаназ закінчів в році 1960 Ужгородьску націоналну універзіту, де здобыв тітул доктора медицины. Іщі перед еміґраційов коло медициньской практікы зачав занимати ся і вытварным уменьом. У 1973-ім році записав ся на Одеську єднорічну школу умень, яку успішно закінчів. Робив країны, портреты ці закутины. У році 1980 еміґровав до Мадярьска, робив лікаря в місті Осод і продовжовав в мальованю. В його творах было все видіти вплив його родной Підкарпатьской Руси.

На фотоґрафії: „Осінній пейзаш“. Жрідло: www.xory.ru.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА