ПУЛС выдав русиньскы колядкы

Піддукляньскый умелецькый людовый субор (ПУЛС), єдиный на світі професіоналный русиньскый фолклорный ансамбель лем кінцьом минулого рока выдав в рамках святкованя 60-ой річніці од свого заснованя албум під назвов Заспівайме собі. В тых днях приходть ПУЛС із новостьов. Його прихыльници будуть годны в обробліню нашого ансамблю выслухати собі русиньскы колядкы.

Щедрый вечур є назва нового рождественного албуму, котрый приготовив про своїх слухачів ПУЛС. На албумі находить ся вісем русиньскых колядок, міджі іншым і так знамы як В Віфлеємі новина, Нова радость стала ці Небо і земля. Албум обсягує і бонусову колядку – по русиньскы заспівану, ноторічно знаму, оріґінално австрійску коляду в авторстві Йосефа Мора і Ксавера Ґрубера Тиха ніч. О музичны обробкы ся на албумі постарав Юліюс Селчан, котрый на албумі і діріґовав, інштрументацію зробив Мілош Веверка, співанкы на албум выбрав умелецькый директор ансамблю Юрай Швантнер.

„Щедрый вечур – день, на котрый ся вшыткы тішать, бо дні Рождества суть тоты найкрасшы свята рока. Час покоя і любови, коли за облаками політують сніговы влочкы, всяды навколо нас уж чути пахоту щедровечірніх їдел і капустніці. Поломінок рождественной свічкы, пахота меду ці часку вытваряють маґічны і незабытны хвілі. Світелка на рождественных стромиках зогрівають нашы сердця і вшыткы собі в кутику душы жычіме, жебы тоты свята тримали вічно… Ожывають стары традіції. Рождественна мелодія ся закрадать до нашой мысли і сердця і вытварять покійну атмосферу. До той святочной погоды хочеме вступити і мы – членове хору і орхестра Піддукляньского умелецького людового субору нашым новым ЦД – Щедрый вечур і зажелати Вам, милы нашы слухачі, красні і приємно пережыты хвілі при його слуханю.“ Такыма словами пригварять ся на буклеті албуму слухачам ансамбель

Як про нашу редакцію потвердив Матуш Яшко, манажер ансамблю, ПУЛС буде албум презентовати і нажыво. Представліня буде повне колядок з ангелами, пастырями і кралями і несе ся в духу народжіня Божого Сына. Під діріґентьсков тактовков Юліюса Селчана, в режії Ярослава Моравчіка і в професіоналнім умелецькім проведжіню інтерпретів ПУЛС-у будете мати можливость пережыти моменты радости, покоры і умелецького зажытку.

Першый раз лем про запрошену публіку ПУЛС одпрезентує свій проґрам 15-го децембра 2016-го року. О термінах про верейность, котры бы мали быти в януарі 2017-го року, вас будеме інформовати.

Албум Шедрый вечур собі можете купити в будові Театру Йонаша Заборьского в Пряшові, припадно обїднати: телефонічно на чіслі +421 0918 182 791, імейлом на manager@puls-slovakia.sk. Ціна албуму є 8 €.

(Фотоґрафії з албуму: Ян Штовка.)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА