Вышол Лемківскій Річник 2016

Наклaдом Стоваришыня Лемків вышол Лемківскій Річник 2016. Выданя є посвячене істориі і культурі Лемків. 2016 рік – як пише во вступі шефредактор Петро Трохановскій – был зас роком, в котрым вельо ся діяло, што переложыло ся і на зміст публикациі. На жаль, як все, не подарило ся помістити вшыткого, што хотіла бы редакция, бо і книжка має окрислене чысло сторін. Лемківскій Річник на 2016 рік то публикация, в котрій найдеме вельо інтересуючого, з чым в неєдным припадку не стрічали мы ся іщы нияк в нашых публикациях […] – пише дальше Петро Трохановскій.

Подібні як попередні едициі Лемківскых Річників, і сесе выданя єст поділене подля змісту на пару розділів. Початок книжкы то ПОДІІ – місце, в котрым прочытаме о найважнійшых річницях, звязаных з історийом Русинів. І гев єдном з тем, котра істо на свіжо може одкрыти деякы факты, є статя про Дякоучытельскій Інститут в Перемышли – школу, котра гідні прислужыла ся в плеканю цілых поколінь дяків – жаків, якы не лем несли послугу в лемківскых храмах, але і часто учытелювали, ай будили народны мотивы.  Друга част то ЛЮДЕ, де приведены сут персоналиі выдатных осіб, лемківскых творців, активістів. Окрем того, Лемківскій Річник 2016 припоминат нам о ювілеях жыючых персон з русиньского світа, в тогорічным выданю – вміщат четверых того рока святкуючых.

ПОДІІ:

• Петро Трохановскій – Школа особливого поколіня (до 120. річниці покликаня Дякоучытельского Інституту в Перемышли),
• Владимір Хыляк – Мій, блаженной памяти дяк (оповіданя),
• Валерій Падяк – Общество св. Василия в Ужгороді,
• Ярослав Трохановскій – Мій перший ансамбль,
• опрацуваня Маестра Ярослава Трохановоского  – Стоіт липка в поли (пісня);

ЛЮДЕ:

• Василь Хома – Завзятий Русин, культурний діятель і літератор – Іван Кызак,
• Іван Кызак – Свідок, 
• Богдан Ґамбаль – Я сой хлопец справедливий. 130. річниця народин о. Михала Соболевского, 
• Олена Дуць-Файфер – Клавдия Алексович (1830-1916),
• Клавдия Алексович – Пісня Ольдины (верш),
• Клавдия Алексович – Отуманена (комедия в 1. акті),
• Даміан Трохановскій – О. Василий Масцюх – Перший Апостольскій Адміністратор Лемковины, 
• Петро Трохановскій – Річниці ґу одсвіжыню памяти;

ЮВІЛЯРІ:

• Севериян Косовскый – 90. років Адама Барны,
• Адам Барна – Передріздвяний шмуґєль (оповіданя),
• Павел Роберт Маґочій – Жертвенніст і сміліст: Василь Ябур і русиньскій язык, 
• Петро Медвідь – Творчий і неповторний сімдесятник – Штефан Сухый, 
• Штефан Сухый (верш і мініатуры прозом),
• Анна Плішкова – Вірний Богу, Церкви і Народови (статя до ювілею о. Франтішка Крайняка).

Лемківскій Річник мож почытати в бібліотеці Руской Бурсы в Ґорлицях, котра отворена єст в каждий понедільок в годинах 14.00-18.00, або по індивідуальным догваріню в інчым терміні. Позиция є тіж доступна в бібліотеці Кружка Стоваришыня Лемків в Ліґници, та очывидні можлива до придбаня в Стоваришыню Лемків, як і другых місцях, де книжка буде передана.