Енді Варголь в музею Джорджа Люкаса

В Лос Анджелес буде побудуваний музей Джорджа Люкаса – Lucas Museum of Narrative Art. Уж о три рокы американьскій режысер удоступнит шырокій публиці м.ін. фільмовы кліткы з фільму пн. Citizen Kane, коміксы з котом Ґарфільдом, ориґінальны ілюстрациі книжкы Віні Пу, образы Нормана Роквеля і Альфонса Мухы та вельо знимок і діґітальных ґрафік Енді Варголя, артисты світового формату, русиньского походжыня, котрого передставляти радше никому не треба.

По деякых проблемах з основаньом музею в Чікаґо, Люкас од парох місяців глядал нове місце. Під увагу бране было Лос Анджелес і Сан Франціско. Конец кінців, музей буде вознесений в Місті Ангелів. Побудуваня обєкту цілістю сфінансує Джордж Люкас, а што більше, близко 10 тис. памяток (о вартости коло пілтора білийона дулярів), якы ся гын найдут, буде походила з приватной колекциі режысера. Думка на музей зродила ся іщы пару років тому. Футуристичний выгляд будинку запроєктувал кытайскій архітект Ма Янсонґ з архітектонічной працовні МАД. Ззовни припоминал буде форму сінусоіды, фраґменты даху презначены будут під малы загороды з деревами і рослинныма тарасами. Обшыр внутрішніх просторів запроєктуваний єст на коло 2,5 га, з чого коло 1 га то місце на ґалериі. Решту займут конференцийна саля, выкладовы салі, реставрация і кіна.

Выпосажыньом музею будут памяткы, звязаны з тым, што містит ся в дефініциі «нарративной штукы», значыт «narrative arts». То род кумшту, котрий візуалізує, оповідат даяку історию. Обнимат образы, ілюстрациі, фотоґрафію, фільм, анімацию та ґрафіку. Колекция, яка найде ся в Lucas Museum of Narrative Arts, поділена буде на три части: Істория Нарративной Штукы (The History of Narrative Art), Кумшт Кіна (The Art of Cinema) та Діґітальна Штука (Digital Art). В першій з них найдут ся м.ін. образы Нормана Роквеля, Альфонса Мухы, творы ілюструючых книжочкы для діти, напр. Беатріс Потер (Байка про Кролика Пітера), Е. Х. Шепардa (Віні Пу), коміксы Джіма Дейвіса про кота Ґарфільда ци Чарльса Шульца (комікс Peanuts). В другій части поміщены будут памяткы звязаны з кіновым кумштом. Будут то річы, односячы ся до кручыня фільмів (напр. Star Wars, Citizen Kane, Indiana Jones), характеризациі (напр. The Lord of the Rings, Jurassic Park, Frankenstein, Albert Nobbs), візуальных ефектів, а тіж костюмів (презентуване буде облечыня напр. од Діора, Александра МакКвіна) і анімуваных фільмів (Looney Tunes, The Jungle Book, Dumbo, Who Framed Roger Rabbit).

Остатня част посвячена буде діґітальній штуці і новым технолоґіям. Видіти в ней буде мож м.ін. як роблены были специяльны ефекты до фільмів Avatar, Jurassic Park, Pirates of the Caribbean, The Lord of thе Rings, або анімациі до байок Shrek ци Toy Story. Цікавостком будут ґрафікы Едні Варголя, котры артиста зробил в половині 80. років на компутері Аміґа 100. Пару років тому творы зо старых дискєток одзыскал музей маляря.

Lucas Museum of Narrative Arts має замірене быти місцьом без барєр, місцьом, в котрым неє поділів медже высоком а популярном штуком, што дозволит на свобідне познаня шырокого змісту нарративной штукы.

Фот. горі: lucasmuseum.org.