Концерт Терочкы в «Літерацкій Кавярни» в Кракові

5. лютого/фебруара 2017 r. на краківскым Казімєжу проходил вечeр з лемківском музыком. В просторах Кавярні Літерацкой, культурного місця, де свою творчіст презентувал уж неєден артиста, мала чест вказати ся Терочка, молодіжний ансамбль Руской Бурсы в Ґорлицях. Был то уж другій тогорічний выступ бурсяного ансамблю в тым місті.

Мож повісти, што Терочка то фурт розвиваюча ся ґрупа. Ансамбль дає штораз то більше концертів, а час-до-часу доходят до него новы члены. Ґрупу веде од 2014 р. Андрий Трохановскiй. Мают в своім репертуарі, окрем народных, і авторскы русиньскы співанкы.

Выступ ансамблю (як і вказаня лемківского фольклору як раз в такым місци) вышло з ініцятивы Петра Козьміньского, великого любителя русиньской культуры, а при тым студента росийской філолоґіі з лемківско-русиньскым языком на Педаґоґічным Університеті в Кракові, для котрого речена кавярня є місцьом працы. На його пропозицию пристали властителі і запросили Терочку до себе.

B Літерацкій на єдній зо стін поміщены сут плякаты, котры заповідали стрічы з цікавыма людми, проходячы в просторах Кавярні. Промуючий выступ ансамблю плякат нашол ся серед другых, анонсуючых зорґанізуваны акциі з такыма знаныма людми днешнього світа, як напр. Роберт Бєдронь – польскій політик, Моніка Ярузельска – журналистка, ци знана хыбаль вшыткым Маґда Ґеслер. То місце, де вказуване было великє чысло спектаклів і кабаретів.

Не без причыны Літерацкій Кавярни дано таку же назву. Є она споіньом парох поміщынь. В єдным находят ся колекциі книжок, а медже реґалами выгідны фотелі, де мож розсісти ся і затратити в лектурі – і то іщы при ароматі кавы. В другым же орґанізуваны сут стрічы з інтересуючыма людми, часто проходят там промоциі книжок. В Літерацкій находит ся тіж саля з естрадом, перезначена до концертуваня і орґанізуваня стріч з творцями, якы репрезентуют вшелеякы просторы артизму, кумшту і знаня.

Недільний вечер был добром нагодом, жебы стрітити ся з Лемками, почути лемківскы звукы ци бесіду, подивляти строі, зачырпнути хоц лем кус лемківской культуры. Терочці тото выступліня дало можливіст пошыріня кругу фанів – любителів іх музыкы. Был то такой годинний концерт. Ґрупа запрезентувала шырокій репертуар, од коляд по світскы співанкы – і традицийны, народны, і нелемківскы. Співаня переплітане было заповідями кєрівника ансамблю, Андрия Трохановского, котрий коротко накрислял тематику і походжыня співанкы. На конец слухачы горячыма бравами заохотили ансамбль до выконаня іщы єдной, бісовой співанкы, што вказало, же выступ полюбил ся присутным гостям. Вчас концерту мож было придбати собі свіжо выдану платню ансамблю, вынятково в промоцийний ціні, што част публикы охочо схоснувала.

Посеред присутных нашли ся люде з ріжных сторін світа, котры акуратні перебывали в Кракові. Были люде походжыньом з Украіны, Петерсбурґа ци навет Голяндиі. Прибывшым гостям полюбила ся наша рідна музыка, о чым свідчат приємны слова, котры мож было почути по выступі, чого засвідчыньом може быти тіж велика кількіст проданых платен. По концерті найблизшы приятелі Терочкы остали іщы, жебы спільні поспівати при пригрываючій терочковій капели, завдякы чому лемківска музыка звучала на Краківскій 41 аж до пізного вечера.

Тота подія вказала, же наш фольклор фурт тішыт ся заінтересуваньом. А з уст властителя уж можна было почути, што буде хотіл іщы даколи зас витати Терочку в просторах Літерацкой Кавярні.

Пониже знимкы з концерту.