Русины в ЗША бутут ся стрічати

В русиньскій діаспорі в ЗША поєдны одділіня Карпаторусиньского Общества (Carpatho-Rusyn Society) орґанізуют в найблизшым часі подіі, вчас котрых присутны будут мочы дознати ся дашто з істориі, той повязаной з еміґрацийом Русинів о старого краю до індустряльного центру, якым явил ся в тамтым часі штат Пенсильванія (особливо місто Пітсбурґ, де направляли ся десяткы тысячів жытелів Галичыны), або істориі повязаной з місцьом походжыня – Карпатском Русю. Заплянувано стрічу тыкаючу деревяной архітекты, варштаты прикрашаня яєц і стрічу посвячену бодай не найславнійшому Русинови світа – Енді Варгольови.

Перша з них, орґанізувана одділіньом Youngtown, буде проходилa 25. лютого/фебруара в місцевости Hermitage. Зо свойом прелекцийом пн. Одкрываня і публикуваня істориі Русинів штату Пенсильванія (Uncovering & Publishing the History of PA’s Carpatho-Rusyns) выступит Річард Кастер (Richard Custer). Через рокы згромадил він вельо історичного материялу: церковны і другы метрикы, іміґрантскы ґазеты, фотоґрафіі, але тіж бесідуваны спомины, якы сут документацийом жытя Русинів на обшыри Пенсильваніі. На іх основі, та на основі додатковых досліджынь тыкаючых міґраций, Річард Кастер буде мал вельо до оповіджыня про історию Русинів тамой обшыри.
Дата і місце стрічы:
25.02.2017, 1:30-4:30 pm EST
St Michael Byzantine Catholic Church
2140 Highland Rd, Hermitage (Pensylwania) 16148

Того же дня, а лем в інчым місци – в місті Plano в штаті Тексас, Лі Ен Славік Ердер (Lee Ann Slavik Erder) буде бесідувала про жытя Енді Варголя. По словным введіню вказана буде перша част докуметну з 60. років телевізиі ПБС пн. Andy Warhol.
Дата і місце стрічы:
25.02.2017, 1:30-4:30 pm CST
Environmental Education Center
4116 W. Plano Parkway, Plano, TX 75093

Зато 5. марця в місцевости Maple Heights штаті Огайо, o. Емілиян Гутнян (Emil Hutnyan) буде бесідувал про символику і історию архітектуры інтерєру деревяных церкви.
Дата і місце стрічы:
05.03.2017, 2:00-4:00 pm ЕST
St.andrew’s Eastern Orthodox Church
16029 Maple Park Dr, Maple Heights 44137

На 11. марця в місцевости Burr Ridge в штаті Іліноіс заплянувано варштаты писанок. По презентациі каждий буде міг сой самому побаткати яйця.
Дата і місце стрічы:
11.03.2017, 1:00-4:00 pm CST
St. Peter & St. Paul Orthodox Church
6980 S County Line Rd, Burr Ridge, Illinois 60527

Послідньом подійом в марци єст презентация пн. Вандрівка до краю предків (A Trip to the Homeland) Джорджа Напуды (George Napuda). Тота стріча  одбуде ся 25. марця в місцевости Wayne в штаті Ню Джерзі. Будут то особистиы спомины Джорджа Напуды про влонишню подорож на Підкарпатску Русь, м.ін. до рідных сел: Кляченева, Іванівец, Жукова, а тіж до Мукачева і Ужгорода.
Дата і місце стрічы:
25.03.2017, 1:30-4:00 pm EDT
Wayne Public Library
461 Valley Rd, Wayne, New Jersey 07470

На знимці горі перший конвент Грекокатолицкого Союзу Церковных Братств, 1893 р.