Дві неділі – дві подіі американьскых Русинів

Карпаторусиньскє Общество то шувні діюча орґанізация, што бодай каждий вікенд єй чысленны одділіня в ЗША орґанізуют поєдны подіі, будучы частю шырокого діапазону діяльности общества. Недавно, актуальну діяльніст орґанізациі представляли сме заповідю двох подій, повязаных з приходячыма Великодніма святами, а уж тепер маме нагоду заявити о дальшых двох, з чого єдна так само буде про Великден.

Подіі пройдут за шором в слідуючы неділі. Перша, одбуде ся в найблизшу неділю, 2. квінтя/апріля т.р., а єй орґанізатором є одділіня общества в Клівленд, штат Огайо. Буде то стріча, якой темом має быти сопоставліня традициі Великодніх свят, празднуваных в Европі і Америці. Стрічу буде вюл грекокатолицкій священник – о. Йоан Чіжмар. Доповід пройде в Пармі, в тамтышній бібліотеці (Parma-Snow Library, 2121 Snow Road, Parma, OH), вступне дармо.

Дальша з подій, якой орґанізатором являт ся найдале высунене на захід ЗША одділіня Карпаторусиньского Общества – Пілнічно-західнє, пройде в неділю, 9. квітня/апріля т.р., в Сієтль, штат Вашынґтон, в єдным з польскым центрів (The Polish Home, 1714 18th Avenue, Seattle WA 98122). Темом подіі буде віртуальна вандрівка на Пряшівску Русь і в Карпаты, якы являют ся жытлиском Русинів. Про тематику повзязану з реґіоном буде оповідала єдна з участничок тогорічной 7. Медженародной Літньой Школы Русиньского Языка і Культуры Studium Carpato-Ruthenorum – Боні Кобек Бурк, яка подібны стрічы орґанізувала уж влони, де оповідала о своіх спостережынях – перше в Пілнічній Каролині, а пак в Джорджіі. Другом прелеґентком буде Патриция Крафчік – докторка, яка выкладат на Коледжы в Олимпіі, занимаючы ся росийскым языком і культуром, славяньскыма студиями, та росийскым і славяньскым фольклором. 

фот. Фб