Меланія Рымар нагороджена

Меланія Рымар, русиньска писменниця для діти, остала выріжнена нагородом імени Йована Змая (сербского писменника). На стрічы, котра прошла 11. мая т.р., поінформувано, же Заряд Медженародного Центру Літературы для Діти Змайовы Дітячы Гры рішыл о признаню нагороды Меланіі Рымар за популяризуваня літературы для діти. В окремых катеґориях нагороджены остали тіж Миряна Стефанович та Владислава Войнович.

Торжественне вручыня нагорід проходило буде 7. червця/юнія т.р. в Сримскій Каменици вчас тырваня 60. едициі Фестівалю Змайовы Дітячы Гры – найбільшого літературного фестівалю для діти орґанізуваного в Сербіі.

Меланія Рымар (вр. 1958 р.) – русиньска писменниця з Руского Керестура, єст єдном з невельох занимаючых ся літературом для діти по русиньскы. Пише про наймолодшых, одколи працує в редакциі дітячого часопису «Заградка» печатаного на Бачваньскій Руси. Єст авторком м.ін. збірок поезиі Скорійшы новины (1983 р.), Літо в діда (1987 р.) ци Сон сонечка (1991 р.). Част єй вершів мож найти в лемківскій діточій антолоґіі поезиі Мамко куп мі книжку (1995 р.).

Рахуванка

Єден єлєнь,
два дубочкы,
три торбочкы,
штырі шпачкы,
пят патычок,
шіст шковранків,
сім синичок,
вісем ворон,
девят дроздів,
десят дичат –
зараз вшыткых
вас выкличу.

Баба і дідо

Баба
то мамусіна мати,
прото ю дідо
за свою бабу
мусіл взяти.

Дідо
то няньо нянюсів,
прото го баба
за свого діда
хтіти мусит.

Фот. за ruskeslovo.com