Перший автопортрет Варголя на продаж

В 1963 році король поп-арту был уж знаным артистом, портретувал. Утырвалил на полотні лиця Мерилін Монро, Елізабет Тейльор ци Ельвіса Преслі. Єдного дня ввошол до нюйоркской фотобудкы і одкрыл тзв. сельфі.

Варголь долучыл до такой ґрупы артистів як Рембрандт, Ван Ґоґ ци Пікассо, остаючы єдным з важнійшых в істориі штукы автором портретів самого себе. Шак в чым Варголь мал быти гірший од спомненых горі, сучасных му звізд і чом бы він сам не міг быти геройом твору штукы? Перед фотоапаратом каждий, ци то бідак, ци богач, позує так само. Подібні як коля ци пушка зупы, котры смакуют так само, незалежні од того, ци купит іх президент, ци урядник.

Перший з чысленных автопортретів выставлят на продаж 28. червця/юнія Авкцийний Дім Сотбі з Лондону. Як мож найти на сайті інституциі, рахувана ціна образу містит ся в переділі од 6.5 до 9 млн дулярів. Портрет початково находил ся в приватных руках. В 1978 році швайцарскій колекцийонер штукы Томас Аман отримал го од Варголя. Образ был парократні презентуваний на выставах в Швайцариі (м.ін. в Ґален, Ґрацу, Цуріху).

В пізнійшых роках Варголь зрезиґнувал з хоснуваня знимок з фотобудкы до портретів (робленых пак техніком серіґрафіі) на річ фотоґрафій зробленых професийным апаратом. До такых міг приняти выстудиювану позу, а піл лиця лишыти в тіни, чым, в його одчутю, не дозвалял цілковито одкрыти свойой особы. З часом зас змінил ся підхід Енді до автопортретів, особливі по 1968 році, коли то остал пострілений. Вказувал товды на них, же конфронтує факт уплываючого часу з, дакус рембрандтовскым, почутьом зворушыня.

Барже нич в якого-небуд інчого артисты, будуваня тзв. іміджу, ідентичности і публичного візерунку Варголя было неодлучном частю його штукы. Перше сельфі творці мат зато барже історичну, як артистичну вартіст.

Фот. Авкцийний Дім Сотбі