Конференция „Едукация нацийональных і етнічных меншын на Сандеччыні”

22. жолтня т.р. в Ґаліцийскым Місточку в Новым Санчы проходила конференция Едукация нацийональных і етнічных меншын на Сандеччыні, яку зорґанізувал Малопольскій Центр Досконаліня Учытелів Осередок Досконаліня Учытелів в Новым Санчы.

Цілю конференциі было проаналізуваня стану едукациі нацийональных і етнічных меншын на Сандеччыні і здіаґнозуваня школіньовых потреб учытелів, якы роблят з меншынами, але і презентация примірів спілпрацы асистентів і учытелів, дидактичной роботы, успіхів шкіл в роботі з меншынами і презентация словацкых освітовых інституций, якы роблят з ромском меншыном (на чым, головні, зосередила ся ціла конференция). Окрем того, єдным з елементів конференциі были выступы діти з ріжных меншын – до репрезентуваня лемківской прошений был ансамбль Терочка з Руской Бурсы.

На Сандеччыні ведены сут занятя головні з ромском і лемківском меншыном, в меншым вымірі украіньском.
Забракло на конференциі даякых статистычных даных про вчыня меншын на Сандеччыні і фактычной бесіды про проблемы, з якыма стірчяют ся меншыновы учытелі та про способы іх розвязань.