Сто тисячів непубликуваных Варгольовых фотоґрафій внет доступных онляйн

Енді Варголь, окрем творіня серіґрафік і хоснуваня вшелеякых метод творіня образів, занимал ся тіж фотоґрафійом. Хоц то може меньше знана обшыр його артистичной діяльности, доднес не сут знаны світу його приватны колекциі. Фундация Енді Варголя рішыла тепер удоступнити близко 100 тис. приватных знимок, котры не лем представляют самого артисту, але і його славных знаємых.

Выштко зачало ся од ініциятивы Університету Станфодра в Каліфорніі, якій принял од Фундациі речену колекцию. Університет в рамках нового проєкту Contact Warhol Project займе ся тепер діґіталізацийом і постепенным выставлюваньом онлянй приведеных знимок. Більшіст з них николи не была публикувана. Як інформували лідеры проєкту, Варголь за свого жытя выкликал лем коло 17% знятых кліш.

Колекция презентує знимкы з 1976-87 рр. Вшыткы они представляют приватне жытя короля поп-арту. Видно на них не лем самого Варголя, але тіж його знаных приятелів, так само звізды поп-культуры, творячы в його періоді жытя. Варголь знаний был з того, што підтримувал односины з артистичном богемом Ню Йорку, а і шырше – цілой Америкы. Хоц прожывал в ЗША, на вказаных знимках найти мож знаных цілого світа. Єдна з них представлят Енді з леґендом бразилийского футболю, Пеле.

Колекция представлят тіж м.ін. Майкеля Джексона, Джона Леннона ци Ляйзу Міннелі. Варголь, як більшіст артистів, мал своі обсесиі. Своім фотоапаратом знимал вшытко, што находило ся вокруг него. Мож речы, што выпередил днешні смартфоны, котрыма годны сме з минуты на минуту фотоґрафутати ачий кажду част нашого жытя. Енді робил тото уж в 1976 р. Хоснувал пересічні єдну рольку фільму на ден.

Зняты образы представляют Варгольове жытя, почынаючы од імпрез і гулянок зо знаныма камаратями, а кінчучы хоц бы на знимках уличных знаків. Соткы з них документуют розвиток романсу з остатнім партнером Варголя, Джоном Ґольдом.

Діґіталізацийний проєкт ведений є через ансамбль професорів штукы з Університету Станфорда. Колекция фотоґрафій вказує на факт затераня ся границі помедже інтимністю приватного жытя, а вказуваным назовни кумштом. Самособом, сут документом того, што Варголь цінил в своім жытю, а то непрестанного гляданя артизму всядиваль, де лем го мысель понесла.

Першы зо знимок будут в вересни/септембрі выставлены в Артистичным Центрі Університету Станфорда. Выйде тіж книжка присвячена тому нештоденному проєктови, яка напечатана має быти в листопаді/новембрі. Діґітальна бібліотека, рахуюча 100 тис. фотоґрафій, зачне фунґувати до кінця текучого рока.