Радийо ЛЕМ.фм на «Панноніці» в Бартицях
Буде то уж 6. едиция Фольклорного Фестівалю «Панноніка» в Бартицях (Barcice) над Попрадом, де в днях 30. серпня/авґуста до 1. вересня/септембра буде проходил єден з найбільшых фестівалів етнічной та балканьской музыкы в Польщы і Европі.
Як бесідуют орґанізаторы фестівалю, «Панноніка» то не лем жывий, пленеровий фестіваль. То тіж барз вельо культурных, музычных і театральных варштатів, одкрытий для вшыткых прибываючых. В тым році приіхают ансамблі з Румуніі, Мадярів, Босні і Герцеґовины, Болгариі, Сербіі (в тым тіж ансамблі з Войводины, де розселена русиньска меншына), Польщы аж і Іспаніі та Швециі. Каждого рока фестіваль зберат навет і до 10 тис. люди з цілой Польщы і реґіону Карпат.
Редакция радия ЛЕМ.фм достала акредитацию на тогорічну «Панноніку» і неодолга буде більше о той подіі інформувало. Покля што, о проґрамі і цінах за вступ мож прочытати на сайті фестівалю www.pannonica.pl.
