Реляция з пішого поломництва на праздник св. Максима Ґорлицкого

Ґрупа стрітила ся іщы перед сходом сонця в церкви Покровы Пресвятой Богородиці в Ждыни – рідным селі св. Максима. Святу Літургію служыл о. Юлиян Феленчак і о. ігумен Пафнутий.
В мурах церкви зобрали ся парохіяне і поломникы не лем з Лемковины, але і Варшавы, Кракова та Вроцлавя.

За вікнами пілмрак іщы покрывал околиці. Темна парувікова церков, єй середина освітлена свічками та традицийний лемківскій спів створили містичну атмосферу, зближену до великодньой. По літургіі о. Феленчак підкрислил, же то історична подія. Перший раз вырушыло піше поломництво на праздник св. Максима Сандовича. В тот скромний спосіб могли сме оддати чест нашому небесному опікунови. Была то тіж можливіст познати його історию, місце, де ся вродил, ховал, молил, де был похований і де находят ся його мощы. Того ранка участникы могли разом помолити ся перед іконом святого і зъєднати через Святу Причаст.

Дальше поломникы пішли на цмонтір, де одслужено молебен. На ним находят ся гробы св. Максима і його близкой родины. Там спочывали мощы святого і одтамаль были перенесены до Ґорлиц в 2007 р. Пак поломникы рушыли до Ґорлиц.

Першым пристанком на трасі был ґладышівскій осередок ЕЛЕОС, де місцевий парох, о. Бараньчук, зорґанізувал сніданя. По ним ґрупа з молитвом в серцях і на устах вырушыла в дорогу. Дорога вела через Маґуру, Новицю до Білянкы, де одслужено молебен, а поломникы могли посмотрити на роботы ведены при розписаню церковных стін.

Дале ішли через Шымбарк, Ропицю Польску і головну ґорлицку дорогу, котра довела іх до православной церкви Святой Тройці. Там вшыткы помолили ся до покровителя. Поломництво закінчыло ся при мощах святого. В тым місци о. ігумен Пафнутий подякувал участникам за труд і молитвы, котры поломникы передали до св. Максима. Повіл, же єст то свідоцтво жывой віры молодых люди і єдночасно вказує, же священномученик Максим єст для них важным святым.

Поломникы брали участ в богослужынях. Окрем молитвы служыли при олтарі, свічках, продавали в склепі, співали та выдавали стравы.