Ретрансмісия концерту хору АКСІОС – четвер, 20.10 год.

З благословліня Высокопреосвященнійшого Юрия (Георгія), Архієпископа Вроцлавского і Щеціньского, Православного Ординария Польского Войска, 16. грудня/децембра 2018 р. в православній церкви Св. Тройці в Любіні о год. 11.30 проходил Концерт Церковной Музыкы, в котрым заспівал хор АКСІОС з Сынкович.

Хор Аксіос основано 31. серпня/авґуста 2015 р. В його склад входят абсольвенты Білоруской Нацийональной Музычной Академіі, Білоруского Нацийональого Педаґоґічного Університету і Білоруского Нацийонального Технічного Університету. Дириґентком хору єст Дария Колпашнікова.

Хоц хор Аксіос істнує лем пару років, а його членами сут тіж молоды выконавці, студенты і абсольвенты высшых шкіл, то і так скоро стал ся знаний в шырокым світі. Выступувал на вельох медженародных переглядах і концертах ансамблів церковной музыкы. Аксіос давал выступы парунадцет разів в Польщы. В роках 2016 і 2018 на Медженародным Фестівалю Церковной Музыкы в Гайнівці двараз был лавреатом ІІ місця.

Того рока хор одвиділ тіж любіньску парохію. В репертуарі нашли ся:
1. «Гымн до Божой Матери» з Супрасльского iрмологiйона, незн. автор (1630 – рр.)
2. «Ныні отпущаєшы», Локтєв В. В.
3. «Величыт душа моя…», Н. Богодаєв
4. «Великє славословя» Скітскє
5. «Єдинородный Сыне», А. П. Рычагов (1880-1930 рр.)
6. «Святий Боже» гарм.мон. Юлияніі
7. «Тіло Христово» Ю. Зуєва
8. «Ісхіти мя Владычыце» стародавний напів
9. «Молитва Михаілу Архангелу»
10. «Кондак № 13» акафисту Пресвятой Богородиці пред іконом «Всецариця», А. Побідимскій
11. «Торжествуйте днесь», А. Туренков
12. «Под твою милость» для женьского хору мон. Юлияніі
13. «Крынічка», сл. С. Литвинчык, муз. І. Климчук
14. «Мая Усецарыца», гарм. В. Петько
15. «А ми люди подорожні», укр.колядка
16. «Звіздочка в небі…», укр.колядка, перевід Марка Лермонтова, обр. Х.Д.
17. «Dzisiaj w Betlejem» сл. і муз.: за співником Сєдлецкого костельника з 1965 р., опрацувал: Фелікс Нововєйскій (1877-1946)
18. «Дзвон же, дзвон» американьска мельодия
19. «Gwiazdka na wschodzie» польска коляда
20. «Zaśpiewam Jezuskowi» сл. Адам Заxнер, муз. Станіслав Морито
21. «Французская колядка» обр. і текст мон. Юлияніі (Денісовой).

Для парохіяльной спільноты концерт был великым пережытьом, вельох не вкрывало зворушыня. На закінчыня стрічы парох отец Богдан Репела сердечно подякувал і ґратулювал хорови Аксіос, выразил і надію на дальшы стрічы. Парохіяне в рамках подякуваня за духовы пережытя заспівали выступуючым членам хору «Многая Літа».

Ретрансмісию концерту можете зас почути в нашым радию:

20.12.2018 р. (четвер,  20.10 год.)
21.12.2018 р. (пятниця, 5.00 год.)
22.12.2018 р. (субота, 16.10 год.)
23.12.2018 р. (неділя, 16.00 год.).