«A Я[К]» i Матійова – віторок, год. 20.00

Село в долині Навойовской Камениці, 10 км на полудньовый схід од Нового Санча, при дорозі до Крениці. То граничне село лемківского населіня. Сусідня Фрицова была уж польском місцевістю.

В селі найдеме церков вознесену найпевнійше в 1830 р. Парураз была ремонтувана. Є то церков деревяна, орієнтувана, тридільна. Квадратова олтарна част, храм вірных та ізбицьова вежа ошалюваны сут дошками. Столпы вежы обнимают притвор. Над олтарьом та храмом вірных сут шатровы дахы, а в звінчынях три великы бані з маковицями і привидныма літарнями. Середину прикрашат розпис з початку ХХ ст. авторства Фелікса Боґданьского.

Церков обзерайте ниже, а про село слухайте уж од 20.00 год.

A Я[К]…? – звиджаня і познаваня Лемковины од А до Я. Історично-ґеоґрафічны прогулькы по селах і знаных, або меньше знаных, особливостях Лемковины. Што тыжден творена єст нова позиция в радийовій енциклопедиі Лемковины.