Adman: Warhol Before Pop – выстава в Пітсбурґу

Выстава Adman: Warhol before pop, одкликуюча ся до 50. років ХХ ст., зосереджат ся на роках формуваня ся єдного з важнійшых артистів минулого столітя, влияня на мистецтво котрого є фурт актуальне. Презентувана буде она од 27. квітня/апріля 2018 р. в Музею Енді Варголя в Пітсбурґу.

Для більшости творчіст Варголя то передовшыткым серіґрафікы зо знаныма того світа – ци то з видом Мерілин Монро, ци начальника кытайской державы Мао Цзедуном. То певно і славна окладинка музычного кружка з бананом запроєктуваня для ґрупы The Rolling Stones. Релятивні рідко думат ся про першы рокы артистичной карєры Варголя, початкы славной Фабрикы. Речена выстава бесідує про період в діяльности Варголя на 10 років перед тым, як в ЗША зачал царювати поп-арт, про час, коли молодий Енді перенюс ся до Ню Йорку. Уж товды был свідомым бренду і силы реклямы творцьом. Зачал робити як комерцийний ілюстратор для клієнтів з высшой поличкы, для часописів Vogue, Glamour ци Tiffany & Co.

Выстава презентує більше як 300 ориґінальных обєктів, такых як непубликуваны рисункы, фотоґрафіі для реклям в стили вінтaж, артистичны книжкы ци одтворіня склеповых выстав, котры проєктувал Варголь. Експозиция дозвалят на приближыня комплетного образу початкового періоду карєры Варголя в Ню Йорку і того, як добрі уж товды артиста розуміл значыня бренду і реклямы. Безсперечні найважнійшым, а певністю – добрі знаным, а іщы ліпше платным проєктом Варголя, над котрым робил, были реклямовы ілюстрациі черевіків публикуваны в ґазеті The New York Times штырі рокы медже марцьом 1955 а грудньом/децембром 1959 рока.

Adman: Warhol before pop документує етапы формуваня ся успішной карєры іконы поп-арту, з зазначыньом де вштыко ся зачало. На выставі видіти мож і рисункы Юлиі Вархоловой. Експозиция вказує, што Енді был артистом, якій од все розуміл, же творчы і комерцийны обшыри можут спілістнувати.

Выстава орґанізувана єст при спілпрацы Музею Енді Варголя в Пітсбурґу з Art Gallery of New South Wales в Синдi. Отворена буде од 27. квітня/апріля до 2. вересня/септембра 2018 р.