Aнна Плішкова оцінена медайлов

10-го апріля 2018-го року одбыла ся святочна громада Академічной общіны Пряшівской універзіты в Пряшові. Ректор почас того оцінив бронзовов медайлов Анну Плішкову, директорку Центра языків і култур народностных меншын ПУ і єдночасно директорку Інштітуту русиньского языка і културы, котрый належыть під споминаный центер.

Анна Плішкова здобыла бронзову медайлу як оцініня за 20-річну роботу на челі наперед Одділіня русиньского языка і културы Інштітуту реґіоналных і народностных штудій ПУ, потім окремого Інштітуту русиньского языка і културы ПУ, а теперь і Цетра языків і култур народностных меншын Пряшівской універзіты у Пряшові.

Як інформовав Александер Зозуляк, оцініня собі Анна Плішкова із рук ректора Пряшівской універзіты Петра Коні не годна была перевзяти особні, кідьже як раз днесь передавать лекцію в Празі у Славяньскім інштітуті Академії наук Чеськой републікы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА