Ансамбль Серенча святкує 20-літя істнуваня

Того рока лемківскій фольковий ансамбль Серенча святкує 20. річницю істнуваня. З той нагоды ґрупа рыхтує для своіх любителів специяльний концерт, котрий ся одбуде 15. жолтня/октобра т.р. о 16.00 год. в Ґорлицкым Центрі Культуры.

Концерт орґанізуваний єст в рамках проєкту «Творча інтерпретация традициі». Серенча выступит разом з Домославицком Симфонічном Оркєстром під дириґентуром Вальдемара Ґроня. Выступ збогачений буде танечныма ілюстрациями авторства Йоанны Мархвяной. Орґанізатором подіі є Стоваришыня Промоциі Лемківской Творчости «Серенча». Вступ є дармовий, а білеты мож одобрати в Ґорлицкым Центрі Культуры.

Серенча была основана в 1997 р. Романом Корбичом, Петром Квоком і Мирославом Трохановскым. Творена нима лемківска музыка зміняла ся протягом років в барже сучасну, але дале был то акустичний фольк. Іх аранжациі дают інче пізріня на фольклор, а тото дозвалят дотерти до сучасного слухача, помагат пропаґувати лемківску культуру. На початку Серенча грала головні для лемківской публикы, давала выступы м.ін. на ватрах ци Лемківскій Творчій Осени. Пак зачали ся явити пропозициі концертів в цілій Польщы і поза границями державы – ансамбль дал вельо концертів в Европі, але і гостил аж і в Африці.  В своім артистичным доробку Серенча мат демо з 1998 р. та 4 платні: «Під облачком», «Зеленым гадвабом», «Поза гумен» та «Ой ле лем».

Фот. serencza.pl