Апостол – Неділя мясопустна – неділя, 09.30 год.

Чітаня з Першого писма святого апостола Павла Корінтянам – зачало 140. (глава 8.; 8-13 – глава 9.;1-2)

(Братя), їдло нас не веде ближе ку Богу, бо кідь не їме – нич не тратиме, кідь їме – нич не набываме. Но мерькуйте, жебы тота ваша слобода не вела слабых до гріха. Бо як дахто збачіть, же ты, мудрый чоловік, сидиш за столом в поганьскій святыні, ці йому, слабому (у вірі) сумліня не дасть смілости, жебы і він їв із жертв принесеных ідолам? А так, про твою мудрость пропаде слабый брат, за котрого Хрістос умер. Коли такым способом грішыте протів братів і убивате їх слабе сумліня, грішыте протів Хріста.

Прото, коли бы їдло вело до гріха мойого брата, радше ниґда не буду їсти мясо, лем жебы-м брата не звів на гріх. Ці я не апостол? Ці я не слободный? Ці я не видів Господа нашого Ісуса Хріста? Ці вы не моє діло в Господі? Кідь про другых я не апостол, про вас я апостол, бо вы печать мойого апостолства в Господі.