«Бесіда» з лемківскым календарьом на 2017 рік

Кінцьом 2016 рока напечатаний остал послідній номер часопису «Бесіда» (но. 6 (153), листопад-груден 2016), в котрым окрем шырокого змісту находит ся і долучений «Календар Бесіды» на 2017 рік. Традицийно што рік, в остатнім номері текучого рока, редакция часопису долучат календар, в котрым найти мож інформациі про церковны праздникы і імянины на каждий ден. В новым чыслі «Бесіды» мож прочытати м.ім. про:

• Даміан Трохановскій, Стріча орґанізаций в Ліґници;
• Богдан Ґамбаль, Лемкы в воєводы;
• Моніка Тылявска, Бурсяна прогулька до Камяной на початок шкільного рока;
• Петро Трохановскій, Штефан Телеп в Никыфора;
• Олена Дуць-Файфер, Самодеґрадация – Спростуваня,
• Севериян Косовскый, 15 років тому выстартывала русиньско-лемківска філолоґія; 
• Анна Рыдзанич, Сила і надія лемківской культуры – І ч. реляциі з ювілею ЛАПіТ Ластівочка;
• Ваньо Дзядик, Велькій Ювілей – до 90. річниці народжыня Адама Барны;
• Даміан Трохановскій – Язык ненависти і аґресия взглядом меншын темом засіданя в МВСіА;
• Петро Трохановскій – Одышол чловек непересічний, щырий патріота Лемковины – спомины на бл. п. Владиміра Тудия;
• Ваньо Дзядик – Спомины на помершых бл. п. Ваня Вожняка та бл. п. Анрия Пласконя;
• Петро Козміньскій – Краківскій Бурсак – ПечаКуча – вельокультуровий Краків; Жыва Бібліотека. 

Окрем поміненых выже статій, в найновшым чыслі «Бесіды» годны сте найти выімок з оповіданя Передріздвяний шмуґєль, авторства Адама Барны, фалаток прозы Шмарливий дідо, Мариі Ґіровой, пару фраґментів з доступной пресы, котры тыкают лемківскых справ, та інчы постійны рубрикы, як поезия, ци Амрозовы передуманя.

Двомісячник «Бесіда» то часопис Головного Заряду Стоваришыня Лемків, выходит од 1989 рока, посвячений єст збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст в каждий понедільок в годинах 14.00-18.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.