Бесіды Сільвіі Бруні з Лемками #10 – проф. Павел Малецкій

В пятницю 2. мая тр. о год. 9:15 просиме слухати бесіду з проф. Павлом Малецкым. Інтервю зробила Сільвія Бруні, польска Італиянка (або італияньска Полька), котра – захоплена Лемковином – рішыла як найліпше єй познати.

Др габ. Павел Малецкій, проф. Технічного Університету в Кракові (AGH). Закінчыл студиі в двох напрямах: Автоматика і Роботика та Механіка і Будова Машын в специяльности: Віброакустика і Інжынєрия Звуку – з найвысшым можливым результатом. В 2013 році на тым самым выділі оборонил докторат пн. «Евалюация субєктивных і обєктивных примет акустичного поля обєктів з великым часом поголосу». Дисертация зосереджала ся на психоакустичных квестиях в перцепциі музикы в міцно поголосовым акустичным поли.

Тепер занимат ся аурализацийом і хоснуваньом амбісонічных технік в анализі акустичных явиск. Занимат ся тіж пересыланьом діґітальных сиґналів, іх перцепцийом, оціном якости і інчыма повязаныма темами.

«Лемківскы Оповісти: Мультікультурова Подорож через Сучасніст». То мультімедияльный проєкт, реализуваный в 2024 році, котрого цілю было приближыти культуру, історию і сучасне жытя Лемків. В рамках сериі возникло 10 авдийоподкастів, в котрых мож почути бесіды з поетами, активістами, професорами, тлумачами, молодым поколіньом Лемків.

За проєкт одповідала Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом была печатана перша антолоґія лемківской поезиі в тлумачыню на італияньскій язык. Подкасты доступны сут в польскым языку, товаришыт ім інтерактивна мапа на сайті siliva.lem.fm.