«Бескідник» помалы ся кінчыт

Маме уж конец червця/юнія і неодолга вакацийна перерва од «Бескідників», яка буде тырвала цілый липец/юлий. Нич не было бы в тым чудного, як бы пак, по перерві проґрам дале был емітуваный, як все, але так не буде. Приближат ся помалы емісия сотного одтинка, котрый буде уж остатнім.

Припомнийме, же «Бескідник« єст ґеоґрафічно-туристичном авдицийом, яка єст емітувана од марця 2018 р. Од самого початку проґрам мож было чути в кажду пятницю, перше о 11.00 год., а од серпня/авґуста 2019 р. подля нового порядку высыланя о 13.00 год. Ведучым авдицию єст фурт Якуб Зиґмунт, спілпрацівник радия ЛЕМ.фм та з Стоваришыня «Руска Бурса» в Ґорлицях од вересня/септембра 2017 р.

Перед тым як поінформуєме, што буде дальше, просиме очывидно слухати проґрам в найблизшу пятницю, 26. червця/юнія 2020 р. В передвакацийным одтинку, девятдесят семым, поіхаме до далекой Америкы, а докладні до Нацийонального Парку «Секвоя». То як раз там роснут найбільшы дерева на світі! Познаме характерны приметы тых рослин, будеме вандрувати туристичныма шляками, а вшытко буде перемішане музиком з цілого світа. Чуєме ся як все о 13.00!

Остатні три одтинкы «Бескідника» (98, 99 і 100) будут названы «специяльныма» і будут ведены в інчый як дотепер спосіб. До спілтворіня іх просиме Вас, дорогы слухачы радия ЛЕМ.фм! Можеме здрадити, як будут выглядати тоты одтинкы.

Бескідник 98 – плянувана дата емісиі 7. серпня/авґуста 2020 р. 13.00 год.

В тым одтинку підеме на гірску прогульку по нашым Низкым Бескіді. Докладный шляк іщы не єст выбраный. Як хочеш, жебы Твоя улюблена траса была описана на антені радия, або просто хочеш запропонувати своі думкы на гірску прогульку, то напиш майля до ведучого проґрам на адрес: kuba@lem.fm або лиш коментар ниже, під статьом. То буде єдина нагода спілтворити радийовый проґрам, так заохочаме барз до контакту з редакцийом!

Бескідник 99 – плянувана дата емісиі 14. серпня/авґуста 2020 р. 13.00 год.

Передостатній одтинок буде єдным великым спомином скоршых «Бескідників». Ведучый проґрам буде споминал на початковы одтинкы, повіст, де уж сме вандрували, іхали, до якых місц літали ци ішли потягом. Буде тіж в тым одтинку момент на тзв. Q&A (з анґ. Звіданя і Одповіди), де слухачы будут мати можливіст звідати ся ведучого о вшытко, што звязане єст з подорожами, познаваньом світа і проґрамом «Бескідник». На Вашы звіданя ждеме лем до 15. липця/юлия 2020 р. Высылайте іх на майльовый адрес ведучого: kuba@lem.fm або пиште в секциі коментарів ниже.

Бескідник 100 – плянувана дата емісиі 21. серпня/авґуста 2020 р. 13.00 год.

Фінал! Так, то буде направду остатній одтинок «Бескідника», в котрым слухачы дознают ся, як возникал проґрам. Ведучый здрадит, як придумал ідею авдициі, де глядал інспіраций, як долго приходило му рыхтувати єден одтинок і буде більше таємниц. І при тым одтинку буде нагода, жебы дати звідана в рамках части Q&A, о што хочете і што повязане єст з проґрамом «Бескідник». На Вашы звіданя ждеме так само лем до 15. липця/юлия 2020 р. Высылайте іх на майльовый адрес ведучого: kuba@lem.fm або напиште в секциі коментарів ниже. На вшыткы звіданя постарат ся Якуб Вам одповісти!

Буде то інтересуючый і барз інчый час, коли скінчыт ся емітуваня «Бескідників». Але можеме повісти, же цілый тот рік єст вынятковый для нас вшыткых, і медже інчыма зато тіж ведучый рішыл не продолжати проґраму по 100. одтинку і скінчыти го на тым символичным чыслі. Што буде дальше? Ци осін принесе дашто нове? Вшыткого дознате ся в своім часі.