Безробітность в ПСК вдяка пандемії наросла. Высоку мають русиньскы окресы

Зачатком 2020-го року належав до катеґорії окресів з процентом евідованой безробітности высшым як 13 в рамках Пряшівского самосправного краю (ПСК) лем окрес Кежмарок. В децембрі там уж належали і окресы Сабінів, Воронів над Топльов, Свідник, Меджілабірці і Бардейов. Інформації подав ПСК.

В марці 2020-го року пандемія коронавірусу запричінила скоре роснутя безробітности по цілій Словакії. Меджі першым і остатнім місяцьом минувшого року дішло ку нароснутю евідованой безробітности майже о 40 процент.

Од юла до октобра безробітность в Пряшівскім краю мірно знижовала ся, но в остатніх двох місяцях знова звекшовала ся великов скоростьов. ПСК має єднако як перед пандемійов найвысшу безробітность в рамках Словакії, ку кінцю року на уровни 11,4 процента. Найгірше є на тім окрес Кежмарок з майже 18-процентнов безробітностьов, найліпше окрес Попрад, де евідують 7,1 процент безробітных.

В децембрі досягла безробітность веце як 13 процент аж в шестьох окресах ПСК. Суть то окресы Кежмарок, Сабінів, Воронів над Топльов, Меджілабірці і Бардейов. Смутный рекорд має Сабінівскый окрес, де меджі януаром аж децембром наросла безробітность із 9,83 на 16,01 процента.

Кедь ся посмотриме на окресы, де жыє векше русиньске населіня, пак є на тім моментално найгірше Свідник, котрый має безробітность на уровни 13,8 прпоцент. Меджілабірці мають 13,6 процент, слідує окрес Бардейов із 13,4 процентами. В окресі Стропків евідують 12,1, процент. Снина має 11-процентну безробітность. Окрес Стара Любовня має 9, Гуменне 8,4 процент безробітных.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА