Братіслава має нового єпарху. Став ним Преосвященый владыка Мілан Лах

В пятніцю 6-го марца 2026-го року Папа Римскый Лев XIV. прияв зречіня ся уряду братіславского єпархы – Преосвященого владыкы Петра Руснака. Єдночасно призначів новым єпархом дотеперішнього помічного братіславского єпіскопа – кір Мілана Лаха.

В братіславскім Катедралнім соборі Воздвиженія Честного і Жывотворящого Креста то в пятніцю на обід оголосив апостольскый нунцій на Словакії Монс. Нікола Джірасолі.

Кір Петро досягнув канонічный вік 75 років в септембрі минувшого року, і подля церьковного права має єпіскоп при тій нагоді подати резіґнацію Вселеньскому Архієрейови, котрый єй не мусить приняти такой.

Владыка Мілан став історічно другым братіславскым єпархом. Інтронізація нового єпархы одбуде в суботу 21-го марца 2026-го року, на Акафістову суботу, у братіславскім Крестовоздвиженьскім соборі.

Владыка скликав духовенство і віруючіх до катедралы

Дотеперішній братіславскый єпарха скликав в четверь 5-го марца духовенство Братіславской єпархії – священиків, діаконів, як і віруючіх на моливту шестого часу із великопостныма поклонами святого Єврема Сірина до катедралного собору на пятніцю.

Кір Петро скликав запрошеных на 11.40 год. Уж в четверь было ясным, же піде о оголошіня важной інформації. Потвердили то і першы знимкы, кедь ґрекокатолицька TV Logos почала робити прямый ефір із собору 20 минут перед оголошеным початком молитвы, а перед іконостасом было поставленых веце мікрофонів і камера католицькой TV Lux.

Было то „календарьне“ рішіня

По молитві шестого часу владыка Петро передав слово апостольскому нунційови на Словакії – Монс. Ніколови Джірасолі, котрый оголосив, же Папа Римскый Лев XIV. прияв зречіня ся уряду владыкы Петра, і за нового братіславского єпарху быв призначеный владыка Мілан Лах.

Апостольскый нунцій подяковав владыкови Петрови за його дотеперішню службу, і повів, же ішло о „календарьне“ рішіня, кедьже єпарха досягнув канонічный вік уж в септембрі.

Пак дали слово новому єпархови. Владыка Мілан подяковав Вселеньскому Архієрейови за довіру, котру му дав тым, же го призначів за нового єпарху. Подяковав і владыкови Петрови за його свідоцтво жывота. Як повів, знає го од часу, коли быв як богослов у семінарії в Пряшові, і владыка Петро там быв втогды шпірітуалом. Подяковав му за приклад жывота, і за то, же вшытко робив із любвов а щіро.

Подяковав так само і цілій Раді єрархів Ґрекокатолицькой митрополітной церькви sui iuris на Словакії, Высокопреосвященому владыкови Йонови Максимови, пряшівскому архієпіскопови і митрополітови, і Высокопреосвященому архієпіскопови Кірілови Васильови, кошыцькому єпархови, бо якраз Рада єрархів дає номінацію Святішому Престолу на нового єпіскопа.

Новый єпарха подяковав і Єпархіалній курії Братіславской єпархії, котра розпочала із будованьом цілой єпархії і їй штруктур по выникнутю у 2008-ім році, коли Ґрекокатолицька церьков на Словакії стала митрополітнов церьков.

Емерітный єпарха Петро Руснак

Владыка Петро Руснак народив ся 6-го септембра 1950-го року в Гуменнім до родины ґрекокатолицького священика, котрый быв почас комуністічного режіму переслідованый і выгощеный із цілов свойов родинов на Чехы. По часі могли вернути на теріторію Словакії, але лем з тым условієм, же будуть жыти в Братіславі.

У 1982-ім році вступив до семінарії і зачав штудовати теолоґію в Братіславі. Рукоположеный быв 14-го юна 1987-го року в Пряшові. В роках 1987 аж 1990 быв душпастырьом в різных парохіях як каплан, пак як парох. У 1990-ім році став шпірітуалом в Ґрекокатолицькій семінарії в Пряшові, і актівно брав участь на їй обновліню.

В роках 1995 аж 1998 быв єпіскопскым вікарійом і канцеларьом Єпархіалной курії в Пряшові. Од 1990-го до 2003-го року учів пасторалну теолоґію і гомілетіку на Ґрекокатолицькій теолоґічній факулті в Пряшові.

В році 1998 вернув до актівного душпастырьства, быв парохом в Бардейові, од 2003-го року быв парохом і деканом в Братіславі.

30-го януара 2008-го року быв Папом Римскым Венедіктом XVI. призначеный за першого братіславского єпарху. Рукоположеный на єпіскопа быв 16-го фебруара 2008-го року в Пряшові руками кардінала Йозефа Томка, владыкы Йоана Бабяка, і владыкы Мілана Хаутура. 9-го марца того самого року быв у Братіславі інтронізованый.

Од 22-го апріля 2022-го року аж до 27-го януара 2024-го року быв Папом Римскым Франціском призначеный за апостольского адміністратора Пряшівской архієпархії, функцію выконовав вєдно із функційов братіславского єпархы. Быв то час меджі тым, як Вселеньскый Архієрей прияв резіґнацію довтогдышнього пряшівского архієпіскопа і митрполіты Йоана Бабяк, аж до призначіня і інтронізації нового пряшівского архієпіскопа і митрополіты Йоны Максима.

Новый братіславый єпарха Мілан Лах

Новый братіславскый єпарха кір Мілан Лах народив ся 18-го новембра 1973-го року в Кежмарку. Родічі походять із русиньского села Остурня.

Богословскы штудії закончів на Теолоґічній факулті Тырнавской універзіты в році 2001, іщі перед тым почав тоты штудії на Ґрекокатолицькій богословскій факулті Універзіты Павла Йозефа Шафарика в Пряшові. На діакона быв рукоположеный владыком Міланом Хаутуром в році 2000 в Катедралнім соборі Рождества Пресвятой Богородіці в Кошыцях, і у 2001-ім році там прияв од того самого єпіскопа і священьске рукуположіня. Є членом Товариства Ісусового (єзуіты).

В роках 2001 – 2003 быв у комуніті єзуітів в Кошыцях, де по році діяв і як науковый робітник в Центрі спірітуаліты Выход – Запад Михала Лацка. Од року 2003 до року 2004 быв повіреный веджіньом того центра, єдночасно выпомагав як священик в Кошыцях і околіці.

В році 2004 почав высшы штудії на Папскім восточнім інштітуті в Римі, де здобыв у 2006-ім році ліценціат з восточных церьковных наук, і в році 2009 здобыв докторат в тій самій дісціпліні обгайобов дізертачной роботы Вклад Юрія Іоаннікія Базиловіча ЧСВВ до монашеской формації василіянів Мукачовской єпархії в роках 1789 – 1821.

Владыка Мілан быв почас римскых штудій і выпомічным шпірітуалом Папской колеґії Russicum, і духовный асістент Федерації скавтів Европы в Римі. Авторьскы співпрацовав і з Ватіканьскым радіом.

По навернутю із штудій в році 2009 робив як директор знова у Центрі спірітуаліты Выход – Запад Михала Лацка в Кошыцях. Єден семестер учів спірітуаліту хрістіаньского Востока на Теолоґічній факулті Католицькой універзіты в Кошыцях, де быв і членом редакчной рады теолоґічного часопису Verba Theologica. Од 1-го децембра 2011 быв продеканом про загранічны односины і розвиток на Теолоґічній факулті Тырнавской універзіты в Братіславі, де учів хрістіаньску спірітуаліту і спірітуаліту хрістіаньского Востока. Владыка знать італійскый, анґліцькый і російскый язык, пасівно знає і французькый язык.

За помічного єпіскопа Пряшівской ґрекокатолицькой єпархії владыка Мілан быв призначеный 19-го апріля 2013-го року Папом Римскым Франціском. На єпіскопа быв рукоположеный 1-го юна 2013-го року в Лютині. В періоді років 2016 аж 2017 быв візітатором Конґреґації про восточны церькви про восточны семінарії і колеґії в Римі.

24-го юна 2017-го року быв Святішым Отцьом Франціском призначеный за аміністратора Ґрекатолицькой русиньской єпархії в Пармі sede vacante. 1-го юна 2018-го року быв призначный пармскым єпархом, інтронізованый быв 30-го юна того самого року.

23-го януара 2023-го року Папа Римскый Франціск выменовав владыку Мілана Лаха за помічного єпіскопа Братіславской ґрекокатолицькой єпархії.

Святішый Отець Франціск призначів 21-го новембра 2024-го року Преосвященого владыку Мілана Лаха за апостольского візітатора про словацькых ґрекатолицькых віруючіх в западній Европі.

Владыка Мілан Лах став за порядком другым правлячім єпіскопом Братіславской єпархії.

Владыка Мілан сам має русиньске походжіня, як уж было спомянуто, і він ся ку своїм коріням уж не раз приголосив і в різных інтервю про медії. Підпорив і русиньску кампань перед списованьом жытелів у 2021-ім році на Словакії.