Бывшый листонош Ґладышова: Вчас выгнаня наше село розділили на дві ґрупы

На нашым портали продолжаме з публикацийом архівальных листів, публикуваных на странах ґазеты «Карпатска Русь», якы писали нашы предкы, реляцийонуючы траґедию выгнаня.

Листы писали ріжны люде – просты ґаздове, часом можніст мали лем тоты, што знали писати і чытати. Але до еміґрацийной ґазеты посылали іх і люде фаху – прикладом єст довыселенчый листонош в Ґладышові – Штефан Гелета.

То, же каждый такій лист чытат ся зо зворушыньом, але і зацікавліньом – ясне. Лем материял «Карпатской Руси» з рока, коли польскы комуністичны власти провели Акцию «Вісла», і парох пізнійшых років то заєдно великє джерело інформаций, якы дозваляют нам зверифікувати тото, што може колиси зачули сме од діда ци бабы, записуючы домашнє інтервю.

Днес на варштат возмеме Ґладышів. Што цікаве – листонош нам што до «йоты» прикликує з імена і назвиска ґаздів, якы были выселены з рідного села. Сам єм чул іщы не так давно од старых Ґладышовян, што фактично село было поділене вчас выселіня на дві ґрупы. Окрем того, приведеный долов материял доказує іщы раз, што Вірхняне были рахуваны як част більшого Ґладышова (мож тото потвердити по прикликаных через Гелету родах). Видно тото і хоц бы по даных транспортів, якы одышли на захід (вказуваны были детально в окремых книжках до темы).

Гелета Штефан зазначыл, што родакы з Америкы такой докінця посылали пачкы своім родинам в Старым Краю. Правдоподібно неєдна наша родина за великом млаком ани не знала, што Ґладышів выселили 8. червця/юнія 1947 р. Не было товды мобільок і інтернету. Нич люде послали листы, пачкы встигли уж прити на Лемковину. Пачкы пак глядали адресатів…

Лист опубликуваный в: «Карпатска Русь», Йонкерс, ЗША, ч. 31, пятниця, 1. серпня/авґуста 1947, стр. 3.

Пише бывший листонош в Гладышові Стефан Гелета просто до редакции «Карпатской Руси» из села Ломница, на Познанщині:

12. VII. 1947

Дорогы братья лемкы!

Хочу вам написати пару слів. Пише до вас бывший листонош Гелета Стефан с почты Гладышів. Як вам відомо, там вашы рідны батькы, братья и сестры роспорошены по цілой Европі. Одны выіхали на всхід, другы на захід, розірвалися сын от отца, брат от брата. В нашых любых горах и в нашом рідном селі руина, никого там нема, тилько, як надходят вісткы, можна побачити псів и котів, котры бігают от хаты до хаты и шукают своих господарів. Але никого нема. Поля так красно засіяны, но нема кому зберати. А то всьо за вашы грошы из Америкы.

Як листонош, я можу заявити, што тысячы вашых пачок и тысячы долларів было прислано из Америкы, а то всьо вы послали нам в старом краю. Наш лемко потішился, орал, сіял, остатний грош выдавал на закуп зерна, штучных навозів, абы свою господарку подтримати. Десяткы років такого урожаю нe было, як сего року. А ту в трьох годинах всьо то треба было зоставити и выіхати на захід.

Я знам, же там до вас приходят листы алярмуючы о помочи. И дійсно поміч потребна. Не забывайте, дорогы братья и сестры, о своих родинах в теперішном часі, бо там, де тепер росселили нашых лемків, земля заросла бодаками. Тота земля рокы юш стоит пусто. Но при вашой помочи наш лемко вытримат и тоту біду.

При выселении наше село Гладышів розділили на дві группы. Одна группа знаходится 90 килом. на захід от Познаня. А за другу группу не знам, де суть. В той другой группі знаходятся слідуючы:

Марчак Теодор, Ксеник Иван, Галушка Параска, Галушка Иван, Квочка Параска, Галушка Hаcтa, Ковальчик Василь, Кобани Евгения, Федорко Ант., Федорко Poзaлия, Михаляк Асафат (Наталии), Мадзуля Николай, Чухта Семан, Шмайда Базиля, Скрипак Иван, Гбур Андрей, Михаляк Тимко, Kiт Kиз., Гбур Василь, Цар Спиридон, Мадзуля Иван, Федорко Гаврило, Вирхнянский Гнат, Грабан Трофий, Гиба Иван, Гбур Павел, Дзюбина Гнат, Дзюбина Петро, Гиба Стефан.

Медвідь Mиx., Станьчак Мих., Пласконь Макс., Дзюбина Дион., Квятко Иван, Підляскович Стефания, Вислоцкий Мих., Суханич Єва, Журав Матрона, Квятко Єва, Михаляк Иван, Скрипак Адам, Жила Петро, Вархнянский Ст., Вирхнянский Василь, Жила Питро (сын Владимира), Дзюбина Иван, Вирхнянский Петро, Вирхнянский Петро (Данька), Стасяк Илько, Глива Иван, Гиба Семан, Телеп Павлина, Бігуняк Анна, Михаляк Лукач, Гиба Томко, Жила Иван, Гуреш Андрей, Галушка Петро.

И гев пришли пачкы декотрых из тых людей из другой группы, бо почтарка в Санкові, знаючи наш адрес, думала, же мы всі разом, и выслала пачкы на нашу почту. Почта хотіла тоты пачкы отослати назад в Америку, але я просил на почті, жебы зaтримати тоты пачкы до часу, аж я достану адрес от тых людей.

До того часу пришли гев на нове місце пачкы до такых людей: Павлина Телеп, Мария Ковальчик, Базиля Шмайда, Мойсей або Асафат Михаляк, Петро Дзюбина, Андрей Чухта, Галечко Мелания, Иван Скрипак.

И с каждым дньом пачкы приходят. Taк прошу якнайскорше прислати мі адресы от тых людей.

А из другой группы, што суть гев, пачкы отримали: Иван Цюрик (2 пачкы), Анна Урам, Теодор Парагус, Иван Сиротяк, Ст. Скрипак, Гончар Павел, Вирхнянский Иван (Петра), Марта Скрипак, Дмитро Смеречняк.

Прошу редакцию «Карпатской Руси» помістити мое писмо, бо я хочу дальше помагати нашым людям в том тяжком положении, абы каждый міг достати лист ци пакунок. И прошу вас, дорогы краяне, не забывати и о мені.

Geleta Stefan
Lomnica
poczta Stobno
powiat Pila,
woj. Poznanskie, Poland