Червеный берег здобыв Ціну А. Павловіча

Книжка куртых оповідань із періоду Другой світовой войны під назвов Червеный берег од Людмилы Шандаловой здобыла Ціну Александра Павловіча, котру уділює Літературный фонд (Literárny fond) за літературны творы писаны по русиньскы.

Фахова журі выбрала книжку Шандаловой із творів, котры были выданы в періоді років 2016 аж 2017. В рамках оціньованя по русиньскы писаной літературы фонд уділює і Премію Александра Павловіча, котру за тот самый період здобыв Миколай Ксеняк за книжку Медвідята на прогульцї.

Літературный фонд уділює од 2005-го року літературну Ціну Александра Павловіча за найліпшый літературный твор написаный по русиньскы і Премії за літературный твор написаный по русиньскы і за тлумачіня літературного твору зо словацького на русиньскый язык. Ціны і Премії Александра Павловіча суть все удільованы творам, котры вышли у попередніх двох роках. Ціну і Премії уділює выбор Секції про оріґіналну літературу на пропозіцію журі.

Святочне передаваня Ціны Александра Павловіча і Премії Александра Павловіча одбуде ся у віторок 12-го юна 2018-го року в Bратіславі.

Людмила Шандалова

Людмила Шандалова є писательков і културнов діятельков серед Русинів Словакії. Жыє у Свіднику. Книжно дебутовала збірков стишків про дітей під назвов Подьте, дїти, што вам повім, котра вышла у 2013-ім році. В році 2015 за свій дебут была нагороджена Премійов Александра Духновіча за русиньску літературу. Теперь оцінена книжка Червеный берег вышла в році 2016.

Окрім того Шандалова пише сценарі про дітячі театралны пєсы. І тот рік была почас русиньского фестівалу у Свіднику, як вже ся то стало традіційов, одпремєрована їй пєса під назвов Юрко і поклад.

Першым стихом, котрый Людмила Шандалова написала, быв Карпаты, Карпаты, до котрого написав музику Йосиф Кеселіця і днесь є то єдна із найпопуларнішых сучасных русиньскых балад.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА