Чісло турістів в Пряшівскім краю наросло

В 2022-ім році уквартельовало ся в Пряшівскім самосправнім краю 888 970 навщівників. Іде о нароснутя о 69 процент в порівнаню з попереднім 2021-ым роком. Но турістічный рух іщі все не досягує чіла сперед пандемії.

Пряшівскый край є третім найнавщівльованішым крайом Словакії, а меджі домашніма турістами є другым найоблюбленішым, інформовала о тім Барбора Чехова з Крайской орґанізації турістічного руху Северовыход Словакії.

Найвеце загранічных з Чеськой републікы

Із майже 888 970 турістів, котры ся уквартельовали в минувшім році, было 212 154 чуджіх гражданів. Тоты творили 22 процент.

Про порівнаня, в році 2021 уквартельовало ся в краю 526 785 навщівників. В році 2019, котрый быв затля найуспішнішым роком з погляду навщівности, было в Пряшівскім краю заєвідованых 1 108 000 увкартельованых навщівників.

„Чісла навщівників і переночовань меджірічно наросли, но іщі все не досягують чісла з років перед пандемійов,“ повів Мартін Яношко, директор Крайской орґанізації турістічного руху Северовыход Словакії. Так само інформовав, же бракують загранічны навщівници, котры вертають ся лем поступно, а впливать на то і вопрос безпечности в повязаню із сітуаційов на Україні.

Найвеце загранічных навщівників пришло в минувшім році з Чеськой републікы, творили 42 процент загранічных, пак слідують навщівници з Польщі, якы творили 19 процент, і Мадярьска, котрых было 9,3 процента із загранічных турістів.

Найміцнішым окресом з погляду навщівности є Попрад, в котрім находять ся Высокы Татры, пак суть то окресы Кежмарок, Бардейов, Пряшів і Стара Любовня.

Турізм підпореный різныма актівностями

„Тішыть нас, же Пряшівскый край і наперек складній сітуації в турістічнім русі є другым найоблюбленішым крайом про домашніх навщівників. Ку підпорі навщівности помогло і веце актівностей Крайской орґанізації турістічного руху Северовыход Словакії а областных канцеларій, котры в краю діють,“ інформовав Яношко з тым, же выраховав вшыткы актівности, котры стали популарны.

Меджі тыма актівностями є наприклад і гра Legandarium, в рамках котрой діти з родічами ходять по вызначеных місцях в краю і зберають конкурзны печаткы. Меджі вызначеныма місцями суть і русиньскы деревяны церькви, ці памятник князя Лабірця в Габурі.

В минлім році Крайска орґанізація турістічного руху Северовыход Словакії так само означовала далшы біціґльовы стежкы ці монтовала новы інформачны таблічкы про турістів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА