Дальша част турніру «Rusyn Cup» в Кошыцях

По успішній части в Братиславі, орґaнізация Молоды.Русины просит на дальшу едицию ІІІ турніру «Rusyn Cup». Тым разом змаганя пройдут в суботу 19. грудня/децембра в Кошыцях.

«Rusyn Cup» то акция для любителів гальового футболю. Принципы змагань сут єдны з жолтньовыма/октобровыма – може ґу ньому записати каждий, кому близка є така форма спорту, але орґанізаторы зазначают, же в командах може грати максимальні трьох грачів, котры не сут Русинами. Команды можут чыслити од 5-9 грачів.

Зголошыня до турніру сут приниманы до 10. грудня/децембра на е-майльовий адрес rusajsa@rusyny.org. Більше інформаций о орґанізуваным турнірі найдете за тым мотузком.

Тогорічна едиция турніру «Rusyn Cup» є кус інча од двох минулых. До змагань приголосило ся більше місцевости, в котрых жыют Русины, м.ін. спомнена уж Братислава, Кошыці, Пряшів ци Нітра. Переможці локальных змагань авансуют до фінальной части «Rusyn Cup», котра пройде на яр 2016 р. О дальшых подіях будеме інформувати.