Депутаты Закарпатьской областной рады припоминають Києву референдум із 1991-го рока. Хотять шырокы самосправы

За інформаціями порталу UZHGOROD.in, котры были публікованы 6-го апріля 2016-го року, депутаты Закарпатьской областной рады на своїм першім пленарнім засіданю третього засіданя схвалили рішіня обернути ся на презідента Україны Петра Порошенка, голову Верьховной рады Україны Володиміра Гройсмана і премєра Україны Арсенія Яценюка, но і на депутатів україньского парламенту, котры походять із Закарпатьской области, жебы підпорили їх леґіслатівну ініціатіву.

В офіціалнім тексті выголошіня депутатів Закарпатьской областной рады, котре портал приніс одкликуючі ся на Пресову службу Закарпатьской областной рады, депутаты підкреслюють, же ся за 25 років існованя Україны вопросы повязаны з формованьом і належным норматівным забеспечіном обчаньского порядку невырішыли.

Депутаты припоминають резултаты Закарпатьского областного референдума із 1-го децембра 1991-го року, в котрім 546 450 воличів Закарпатьской области, што представлює 78,8%, голосовало „за“ выголошіня Закарпатьской области Україны як шпеціалной самосправной теріторії, котра є субєктом в складі Україны. В тексті ся ся тако само находить, же іщі 24-го януара 1992-го року Закарпатьска областна рада своїм рішіньом, на основі резултатів референдума, потвердила і прияла документ адресованый Верьховній раді Україны „О внесіню змін і доповнінь до Конштітуції Україны“. Подля депутатів і днесь жытелі краю очекують внесіня якостных, і сістемовых змін до Конштітуції Україны, котры бы принесли розвиток і зміцьнили незалежну, демократічну, соціалну і правну державу.

Текст депутатів звертать увагу на Стратеґію сталого розвитку „Україна – 2020“, котра была схвалена рішіньом презідента Україны іщі 12-го януара 2015-го року, в котрій ся рахує із реформами Конштітуції, в тім чіслі із децентралізаційов. В стратеґії ся пише і о забеспечіню містной самосправы, будованю ефектівной сістемы теріторіалной орґанізації влады. Ціла реформа бы подля стратеґії мала выходити із Европской харты містной самосправы, прінціпів субсідіаріты, ці фінанчной достаточности містной самосправы.

Із тых і далшых в тексті зазначеных причін депутаты Закарпатьской областной рады просять неодкладно внести зміны до Конштітуції Україны і далшых законів, жебы забеспечіти зміну із централізованого моделу ряджіня державы на модел шырокой містной самосправы. Цілый текст выголошіня можете прочітати ту.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА