Деревяна церьков у Іновці є старша як ся думало, потвердило баданя

Пять деревяных храмів на выходній Словакії перешло шпеціалізованым дендролоґічным баданьом. При церькви в Іновці здобыли даны о скорішім выбудованю як ся думало.

Як інформує аґентура TASR, Крайскый памятковый уряд Пряшів у співпраці з Крайскым памятковым урядом Кошыці помогли научным робітникам з Менделовой універзіты в Бырні. Антон Лишка, фаховый радник Крайского памяткового уряду Пряшів інформовав, же цільом проєкту было точно датовати час будованя і ставебных реконштрукцій храмів.

На теріторії Пряшівского краю были пробаданы Євангелицькый артікуларьный костел в Кежмарку, Ґрекокатолицька церьков святого Євангелисты Лукы в Брежанах (даколи село мало назву Буяк), в окресі Пряшів, і Римокатолицькый костел Непорочного Зачатя Дівы Марії у Высокых Татрах – Старім Смоковці.

В Кошыцькім краю фаховці посмотрили ся на Ґрекокатолицьку церьков Перенесіня мощей святого Николая Чудотворця в Руській Быстрій і Ґрекокалицьку церьков святого Михаіла Архістратига в селі Іновець, обидві в окресі Собранці.

„Дендролоґія уможнює встановити рік і пору рока здобываня дрыв, як і сорту хоснованых дрыв. Важным є, жебы баданый елемент мав підлуповый літокруг, іншак датованя є лем орьєнтачне,“ додав Лишка.

Баданя одобратых елементів проходило в Дендролоґічній лабораторії Менделовой універзіты в Бырні, де встановльовав ся вік стромів.

Резултаты баданя в двох із пятьох баданых обєктів потвердили датованя выбудованя так, як ся о тім пише у фаховій літературі. Якы были резултаты при деревяных церьквах?

Церьков святого Євангелисты Лукы в Брежанах была збудована з яліць зрубаных по 1719-ім році і в роках 1722 аж 1724, што потверджує літературов писаный рік выбудованя 1727.

В припаді Церькви Перенесіня мощей святого Николая Чудотворця в Руській Быстрій, котра датує ся до 1730-го року, не подарило ся зістити вік жадного із баданых елементів конштрукції. Баданя лем потвердило, же на будованя хосновав ся ясень і береза.

Несподіваня пришло в припаді Церькви святого Михаіла Архістратига в селі Іновець, котра є літературов датована до 1836-го року. Дентролоґічне баданя потвердило, же сосны, якы хосновали ся на його будованя, были зрубаны в зимі на переломі років 1772 аж 1773. На будові хосновав ся далше явoр, смерека, тополя і береза.

Фото: Henryk Bielamowicz, Wikipedia.