Деревяна церьков у Вігорлатьскім музею має новый дзвін

В Церькви святого Михаіла Архістратига, котрый є частьов експозіції народной архітектуры і бываня – сканзену, Вігорлатьского музея в Гуменнім, прибыв новый дзвін. Посвященый быв при нагоді Меджінародного дня музеїв, котрый святкує ся 18-го мая.

Одллятый быв у 2024-ім році при нагоді 260-ой річніці выбудованя того храму, котрый походить із русиньского села Новоселіця. Дзвін у тій церькви не быв од того моменту, кедь го в 1970-го роках перенесли до гуменьского сканзену.

„Дзвоны, котры были в тім храмі, лишыли ся в селах Новоселіця і Збой. Кедьже храм быв одвтогды без дзвона, хотіли сьме доповнити тот природный елемент подобных церьквей,“ пояснив про TASR етноґраф Вігорлатьского музея Йозеф Фундак. Дзвін має 45 центіментрів і 60 кілоґрамів.

На новім дзвоні є рельєф покровителя храму – Михаіла Архістратига, як і рокы 1764 і 2024, котры одказують на рік збудованя церькви і рік одллятя дзвона. Находить ся на нім і текст: „Одллятый єм на Божу славу при нагоді 260-ой річніці деревяного храму із Новоселіці.“ Текст є написаный по словацькы.

Выробленый быв з оглядом на характер іншых дзвонів у тім реґіоні. Його тон і розміры суть роботов дзвонолліяря Юрая Воробеля.

„У 2024-ім році было 260 років од збудованя церькви, і зато сьме їй хотіли дати даякый подарунок, котрый бы єдночасно быв інтересным про навщівників, доповнив бы бракуючій елемент, а повнив бы і літурґічну функцію при богослужінях,“ доповнив Фундак.

Дзвін ся буде хосновати почас богослужінь і обрядів, котры з часу на час в храмі одбывають ся, як вінчанкы ці хрестины. Музей так само планує запровадити реґуларне дзвоніня, наприклад на полідне.