Димитрий Дубец (1931-2015)

З жальом інформуєме, же дня 23. лютого 2015 року, вмер бл. п. Димитрий Дубец. Парастас буде служений 26. лютого о 18.00 год. в церкви в Михалові, а похоронны богослужыня зачнут ся 27. лютого 9.00 год. Службом Божом в михалівскій церкви. Пак тіло покійного остане поведене на цмонтір до Тшебніц.

Димитрий Дубец народил ся 1. мая 1931 рока, в селі Фльоринка на західній Лемковині, як сын Йоана і Євфрозины. В 1947 році, як каждий Лемко, был выгнаний з рідной землі і привезений до села Михалів, недалеко Любіна, на Нижнім Шлеску. Родина Дубців заняля єдну з векшых хыж в селі, в котрій неодолга остала зорґанізувана православна церков, де на богослужыня доізджал о. Штефан Бігун. Як подают сусідове покійного, родина Дубців вславила ся тым, же в трудных для них часах, была в силі зрезиґнувати з векшых поміщынь в понімецкій хыжы, жебы зорґанізувати в ней церковне жытя. Самы мешкали в двох меньшых покоях. Одпочатку, коли в Михалові были орґанізуваны першы Лемківскы Ватры на Чужыні, Димитрий Дубец актывні помагал при іх орґанізуваню, а в 2011 році, з нагоды своіх 80. уродин і 60. річниці супружества, остал запрошений до розпаліня ХХХІІ Лемківской Ватры, враз з найстаршым мешканцьом села Михалів. Покійний долгы рокы діял при Церкви, полнил ролю церковника, был церковным старостом, а до кінця жытя остал ся членом церковной рады. Бл. п. Димитрий Дубец был заслуженым діячом Стоваришыня Лемків і членом Кружка той орґанізациі в Михалові.
Вічна Йому Памят!

Інформацию зрыхтувал Северин Косовскій.
Дякуєме за кореспонденцию.