Діти охочо рецитуют лемківску поезию

«Того рока одбыла ся уж ХХ. едиция конкурсу. В моій оціні є він важный і потрібный – вчас змагань діти з вешкым заанґажуваньом як на лекциі, і докладнійше, познают ріжны вершы» – оповідат учытелька Варвара Дуць. Аж четверо єй учеників заняло высокы місця в ХХ Конкурсі Рецитациі Лемківской Поезиі, якій одбыл ся в минулу пятницю 23. мая в Ґорлицях.

Як подає Єпархіяльный Осередок Православной Культуры «Ельпіс» в Ґорлицях, орґанізатор подіі, двадцет років тому, директор Осередка, а при тым і учытель лемківского языка, о. Роман Дубец зорґанізувал першу стрічу з лемківском поезийом. Товды – в основній школі в Роздзілю. «По парох едициях імпреза перенесла ся до Ґорлиц, послідні два рокы конкурс проходил в Бортным, жебы того рока зас вернути до Ґорлиц» – чытаме на сайті орґанізатора.

В конкурсах каждорічні выступує парудесятеро діти з основных шкіл ґорлицкого реґіону, якых рыхтуют учытелькы Мирослава Дубец, Варвара Дуць, Орина Гутыряк, Анна Рыдзанич та о. Роман Дубец. През вельо років в змаганях брали участ і школярі з західніх земель, якых рыхтувал учытель Лука Возняк.

Згідні з реґуляміном конкурсу, каждый участник мусіл запрезентувати два вершы ріжных поетів. «В звязку з тым, же лемківска поезия тішыт ся великым заінтересуваньом і што раз частійше є тлумачена на ріжны языкы світа, в реґуляміні конкурсу орґанізатор допущал рецитацию єдного верша в інчым языку, але ниякій участник того не схоснувал» – чытаме в поконкурсовій інформациі орґанізатора.

Молоды рецитаторы деклямували поезию будителів – Александра Духновича, Александра Павловича ци пізнійшых творців ХХ ст., м.ін. творы Івана Русенка (найчастійше выбераный), Миколая Буряка, Меляніі Собин. Не бракло творчости сучасных поетів: Петря Мурянкы ци Янка Шкірпана.

«Моі діти самы выберают вершы» – оповідат учытелька Варвара Дуць. «Чытам ім на лекциях ріжны пропозициі і як ся дакому подабат, то ксерую. Коли прочытала-м верш Лем Янка Шкірпана, то Михал Криницкій был ним захопленый» – додає. Михал Криницкій з Ліщын в своій катеґориі (клясы 0-2) занял другє місце. Його брат Семан – перше. Оба деклямували Шкірпана.

«Найліпше пішло дітям, котры знают лемківскій з хыжы, і котрых родичы были заанґажуваны в рыхтуваня діти до конкурсу, припильнували, жебы добрі навчыли ся на памят» – констатує учытелька Дуць і додає тіж гіркы слова: «уж мало котре дзецко знат лемківскій з хыжы і пак тото чути – перекручают слова, злі вымавляют. Дошло до того, же нагрывам дітям вершы і пересылам, жебы ся абы-як навчыли». Дополнят, же такы конкурсы як сес ґорлицкій сут барз важны: «єст барз добра атмосфера, атракцийны нагороды, діти добрі ся інтеґруют з інчыма». По першым разі ученикы охочо хотят выступувати в наступных роках.

Кажда дітина отримала принагідну грамоту і нагороду. Был тіж почастунок.

В поєдных катеґориях выріжнены были:

• катеґория І (клясы 0-2)
  1. Семан Криницкій, учытелька В. Дуць
  2. Михал Криницкій, учытелька В. Дуць
  3. Лена Ротко, учытелька В. Дуць
• катеґория ІІ (клясы 3-4)
  1. Софія Рутковска, учытелька А. Рыдзанич
  2. Филип Дзюмбеляк, учытелька В. Дуць
  3. Михалина Вєнцек, учытелька А. Рыдзанич
• катеґория ІІІ (клясы 5-6)
  1. Мартин Рутковскій, учытелька А. Рыдзанич
  2. Павлина Ротко, учытелька В. Дуць
  3. Єлизавета Русин, учытелька А. Рыдзанич
• катеґория ІV (клясы 7-8)
  1. Марта Бодак, учытелька М. Дубец
  2. Дария Ноґавка, учытель о. Р. Дубец
  3. Віктория Радзік, учытелька М. Дубец