Днес праздник Святителя Миколая

19. грудня (6. грудня за старым стильом) в церковным календарі выпадат праздник св. Миколая. Хоц днес більшіст світа тямит го як старшого пана з долгом сивом бородом, в червеным облечыню, што сідит на санях і поганят реніфера Рудольфа, жебы встигнути заполнити в дарункы дітячы шкарпеткы, часто забываме, кым был архієпископ Мир Ликійскых?

Св. Миколай Чудотворец, як называний єст Церковом од вельох чудес, якы стали ся за його причыном, жыл на переломі ІІІ/ІV ст. (ок. 270-ок. 345 р.), т.є. в часах, коли християньство было уж шыроко розпространене в цілій Римскій Імпериі. Гаґійоґрафічны джерела приписуют му чуда, напр. воскресіня моряка, котрий вмер вчас великого шторму, за што до днес вшыткы плываючы по морях і океанах называют го своім покровительом.

Св. Миколай, архієпископ Мир Ликійскых (днес полудньова Турция), был актывным церковным діячом, котрий помагал бідным, хворым і терплячым. Од того іде днешній, хоц міцно окройений з діл святого, комерцийний вид бородатого Санта Кляуса, котрий ограничат ся лем до роздаваня дарунків і звідуваня діти, ци были цілий рік гречны, не были фалечны, помагают родичам, або ци знают повісти даякій верш, або заспівати пісню.

Першы історычны джерела о мирликійскым архієпископі являют ся дост пізно, бо допіро двіста років по його смерти. Не находиме го тіж в джерелах, котры выміняют присутных на І Никейскым Вселеньскым Соборі в 325 р., котрий зобрал ся, жебы обсудити арияньску інтерпретацию походжыня Христа (Арий неґувал божеску натуру Ісуса Христа, зато і сам доґмат о св. Тройци). Подля леґенд і передань, знервуваний св. Миколай – великій противник Ария – мал підыйти до него і вдарити в лице.

Брак джерел о св. Миколаю за його часів поясняют дослідникы, описуючы жытя святых. Найперше шыроко розпространений посеред християн был культ святого, а пак явили ся першы записы о його жытю і діяльности.

В 1087 столітю, мощы св. Миколая Чудотворця были перенесены до італияньского міста Барі, де находят ся і тепер.

Поздравляме чытачів порталю lem.fm з днешнім праздником Чудотворця Святителя Миколая і здравиме вшыткых, котры носят імено архієпископа Мир Ликійскых.