Днес в Люблині стартуют Фольковы Миколайкы

То уж 26. едиция знаного не лем в фольковым світі фестівалю. Днес, т.є. 8. грудня/децембра, в Люблині одкрытьом фотоґрафічной выставы п.н. «Традиция в обєктиві» зачынат ся XXVI Медженародовий Фестіваль Народной Музыкы «Фольковы Миколайкы». Фестіваль традицийно проходит в околицях праздника св. Миколая, але названя асоциює ся тіж з його головныма орґанізаторами і ґаздами – знаном в цілым світі Оркєстром св. Миколая, будучом нестором фолькового граня в нашій части Европы.

«Фольковы Миколайкы» то штырідньова подія, выполнена вшелеякыма однесінями до народной традициі, корінной музыкы, давных звыків, ожываючых наново в виді заплянуваных орґанізаторами акций. Тогорічна едиция зас принесе нам варштаты, выставы, наукову конференцию, але і порядну жменю світовой фольковой музыкы, которой улюбліня ініцияторами фестівалю было причынком до ідеі зачати понад чверт столітя тому першы фольковы стрічы в Люблині.

Нерозлучным пунктом проґраму єст «Одкрыта сцена», т.є. конкурсова част фестівалю, на котрій мают нагоду вказати ся меньше знаны артисты. В пятницю, 9. грудня/децембра, до бою о першы місця стане дванадцет ансамблів, посеред котрых, на примірі ґрупы А Де То Давнійше Строіло, найдеме і лемківскы акценты. Лавреаты конкурсу, окрем нагорід і шансы на шыршу промоцию свойой творчости, выступлят іщы на суботнім концерті, на котрым одбуде ся офіцияльне оголошыня результатів «Одкрытой сцены».

За попередні рокы в ріжных частях фестівалю, і як фестівальовы гості, і як артисты конкурсовой части, выступували лемківскы і інчы, граючы лемківску/русиньску музыку, ансамблі і солисты, м.ін.: Худоба, Черемшына, Капеля Романа Кумлика, Капеля Древутня, Відимо, Юлия Дошна, Музічка, Окмель, ци Серенча.

Люблин остане столицьом традицийной культуры аж до неділі, 11. грудня/децембра, коли концертом мадярского ансамблю Беш о дроМ скінчыт ся XXVI Медженародовий Фестіваль Народной Музыкы «Фольковы Миколайкы».

Полний проґрам фестівалю мож найти на офіцияльным сайті орґанізаторів.

Фото горі: А. Муляк/пресовы материялы