До Книгы рока ПСК 2025 мож приголосити і русиньскы книгы

Пряшівскый самосправный край (ПСК) вєдно із своїма реґіоналныма бібліотеками знова глядать найліпшы книгы повязаны із реґіоном. Як інформовало Одділіня комунікації ПСК, девятый річник літературного конкурзу Книга рока ПСК принесе оцінку найінтереснішых публкацій выданых в попереднім році.

Авторы книжок, котры были выданы в попереднім році, можуть залучіти ся до вже традічного конкурзу Книга рока ПСК 2025. Якраз в тых днях почав його девятый річник. Шторік го выголошують Пряшівскый самосправный край і реґіоналны бібліотекы краю в Пряшові, Бардейові, Гуменнім, Левочі, Попраді, Старій Любовні, Свіднику і Воронові на Топльов.

Термін на номінації книжок, котры были выданы в попереднім 2025-ім році, і суть скапчаны із Пряшівскым крайом тематічно або особов автора текстовой ці образовой части, є до 30-го апріля 2026-го року.

До конкурзу мож номіновати друкованы вязаны або брожованы публікації із приділеным ISBN в словацькім языку, котры вышли од 1-го януара до 31-го децембра 2025-го року. В актуалнім річнику можуть быти номінованы і книгы в русиньскім а україньскім языку, тоты книгы оцінюють ся раз за два рокы. Номінованы можуть быти русиньскы книгы, котры вышли од 1-го януара 2024-го до 31-го децембра 2025-го року.

Девятый річник конкурзу приносить пять номіначных катеґорій: Белетрія про діти і молодеж, Белетрія про дорослых, Научна література, Популарно-научна література, і послідньов катеґорійов є Україньска і русиньска література.

Покля хтось хоче номіновати книгу, треба выповнити електронічный формуларь, і доручіти два выдрукованы фалаткы непошкодженой публікації до будькотрой реґіоналной жупной бібліотекы.

Фахова жюрі буде оціняти їх обсягову, літературну, вытварну і ґрафічну сторону. Наслідно вырішыть о найліпшых тітулах в пятьох катеґоріях.

І тот рік буде уділена і Ціна публікы на основі чітательской анекты, котра буде проходити формов публічного онлайн голосованя. Тото є наплановане од 1-го юна до 31-го авґуста того току.

Жрідло фотоґрафії: Pixabay.com.