До музею Варгола прибыв Молоток і серп

До Музею модерного уменя Енді Варгола в Меджілабірцях прибыли два новы експонаты. Музею їх запожычіли пріватны зберателі і іде о раріты. Єднов є цінне портфоліо Молоток і серп (Hammer and Sickle), другов штири портреты свазійской кральовной Нтомбі Твала (Ntombi Twala). Інформовав о тім словацькый денник Korzár.

Молоток і серп

Варголів Молоток і серп в музею – то шпеціална едіція. Выдрукованых їх было лем десять. В меджілабірьскім музею ся теперь находить протфоліо пді чіслом два.

„На образах Варгол методічно вказав як выникать сітьодрук, як ся окремы верствы передрукують, аж покля не виникне фіналный твор,“ повів про денник Михал Бицько, єден із основатлів музею і сучасный куратор.

Варгол ся мав мотівом молотків і серпів іншпіровати почас свойой навщівы Італії в році 1977, кідь то збачів як ґрафіті на стіні. Іщі в тім році зробив дакілько варіацій того мотіву. Подля Мартіна Цубяка, презідента Общества Енді Варгола, хоць умелець тот твор зробив в часі кулмінуючой етапы студеной войны, рефлектовав в нім прімарно совітьскый сімбол комунізма як його іконічный прояв, а не інтересовала го політіка.

Африцька кральовна

Новым експонатом суть і штири портреты свазійской кральовной. Суть в красній фаребній комбінації. Іде о авторьскый друк, значіть, істо ся їх дотулила рука Варгола, інформовала денник Кармен Ціліпова з музею. Портрет быв так само вытвореный техніков сітьодруку, котру Варгол хосновав майже при вшыткых своїх творах і спопуларізовав єй про уменя другой половины ХХ. столітя.

„Інтересностьов є лінка творена сваросвского крішталиками, котры придавають образу ґланц. Завів то як раз Варгол, пояснила далше Ціліпова походжіня тзв. діамантового пороху на образах.

В Меджілабірцях од року 1991

Музей модерного уменя Енді Варгола в Меджілабірцях офіціално вынкнув 1-го септембра 1991-го року. В тім часі быв єдиным такым музейом на світі. Днесь є єдным із двох, но все зіставать єдиным в Европі. Другый такый музей є в америцькім місті Пітсбурґ. Джон Варгола, Михал Бицько і Михал Ціглаж были головныма ініціаторами выникнутя того музею. Музей моментално властнить 160 творів краля поп-арту.

Жрідло фотоґрафій: korzar.sme.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА