Добило сердце Юрія Ґавулы – вызначного скулптора, родака із Чабин

Як інформовала родина, в пятніцю 13-го фебруара 2026-го року у віці 83 років вмер Юрій Ґавула. Академічный скулптор Юрій Ґавула належав меджі вызначных монументалістів другой половины 20-го столітя на Словакії.

Хоць ціле доросле жытя пережыв у Братіславі, ниґда не забыв на свiй родный край, де ся все вертав, і на своє русиньске походжіня. Його монументалны творы мож найти по цілій Словакії.

Академічный скулптор Юрій Ґавула народив ся 13-го апріля 1942-го року у втогдышніх Вышніх Чабинах (днесь Чабины) в окресі Меджілабірці. В році 1963 закінчів Середню школу умелецького промыслу, пак продовжовав на Высокій школі вытварных умень, де штудовав скло в архітектурі у професорів Франя Штефунка і Вацлава Ціґлера. Штудії закінчів у 1969-ім році.

Ґавула по штудіях набрав напрям ку монументалізму, ку скулптурам. Обрабляв камінь, дерево, желізо, скло, в його руках мінили свою подобу ружбашскый травертін і андезіт. Отворило ся му шыроке поле роботы.

В 1970-ых і 1980-ых роках зробив десяткы скулптур, пластік, основных каменів і рельєфів про зравотнцкы будовы по цілій Словакії. Так само довгы рокы быв педаґоґом, здобыв тітул доцента.

Мав персоналны і десяткы колектівных выстав, быв участником на многых сімпозіях дома і в загранічу. Його творы суть в збірках дакілько ґалерій і музеїв, меджі котрыма мож спомянути Словацьку народну ґалерію в Братіславі, Выходословацьку ґалерію в Кошыцях ці Крайску ґалерію в Пряшові.

Творы Ґавулы мож видіти і в пряшівскій Загороді уменя, де стоїть його Ґрунт, ці в рамках будовы Моноблоку у Факултнім шпыталю Яна Адама Раймана в Пряшові.

У 2022-ім році была выдана книга Лікованя скулптурами: Юрій Ґавула і його творчость про архітектуру (оріґ. Liečba sochami: Juraj Gavula a jeho tvorba pre architektúru). Моноґрафія є резултатом баданя сына скулптора – візуалного умелця Матєя Ґавулы, у співпраці із теоретіком уменя Даніелом Ґруньом.

Якраз сын Матєй в послідніх роках старав ся о архівізацію і пропаґацію творів Юрія Ґавулы. Вызначнов у тій роботі была і моноґрафічна выстава Віталны формы, котру у 2021-ім році зорґанізовала Ґалерія міста Братіславы в просторах Палаца Мірбаха. Выстава представила комплексно його путь скулптора од початків аж по монументалны реалізації, документовану творами, кресбами і фотоґрафіями.

Як інформовала родина, урна із тілесныма остатками Юрія Ґавулы буде по похоронных обрядах в Братіславі уложена до родічовского гробу в родных Чабинах. Блаженый покій і вічная память!

Фото: Патрік Ілло.